في شقة مصر الجديدة

أنا قلبي دليلي قالي هتحبي … ودايماً يحكي لي وبصدق قلبي … أنا قلبي دليلي … حبوبي معايا من قبل ما اشوفه … قلبي ده مرايه مرسوم فيها طيفه … شايفاه اه بخيالي … سمعاه اه بيقولي … يا حياتي تعالي تعالي … غني لي تملي وقولي لي تملي … الحب ده غنوة … كلها احلام … احلامها الحلوة … احلى انغام

على هذه النغمات الراقصة تبحث نجوى (غادة عادل) الفتاه القادمة من شمال صعيد مصر عن حبيبها الكائن بقلبها قبل أن تراه، بطلة فيلم "في شقة مصر الجديدة" 2007 للمخرج محمد خان والذي عرض في إطار أنشطة الأسبوع الثقافي المصري بالكويت

تذهب نجوى إلى القاهرة في رحلة مدرسية مع طالباتها بعدما أصبحت مدرسة موسيقى في نفس المدرسة التي كانت طالبة بها، مستغلة هذه الرحلة في البحث عن مدرستها تهاني التي ارتبطت بها وتذوقت على يديها الموسيقى والمعاني الحقيقية لحب الحياة، وظلت هذه العلاقة قائمة بينهما رغم نقل تهاني من مدينة المنيا إلى القاهرة من خلال المراسلات والإهداء في البرامج الإذاعية

تصل نجوى إلى عنوان شقة تهاني في مصر الجديدة لتجدها غير مقيمة في شقتها ولا احد يعرف مكانها وكل مراسلاتها السابقة لم تصل ليد تهاني وموجودة لدى الساكن الحالي لهذه الشقة يحيى (خالد ابو النجا) الذي يعمل في البورصة متأثراً بحياة المدينة الصاخبة مستقلاً دراجته النارية يجوب بها أرجاء المدينة والمرتبط بعلاقة حب باءت بالفشل لعدم رغبته في الزواج رافضاً قيوده، ويعد البطلين أشخاص عاديين من عالمين مختلفين تجمعهما قصة البحث عن تهاني

ويكتنف الأحدث لحظات من الغموض والإثارة لتوهم يحيى بوجود شبح روح تهاني في الشقة لاعتقاده أن هناك شيء ما غامض حدث لها بسبب غيابها غير المبرر، وبعد فشل نجوى في الوصول إلى تهاني لا تستطيع اللحاق برحلتها في قطار العودة مع رحلتها ويساعدها سائق التاكسي (أحمد راتب) ـ أرمل وله بنتان توئم ـ بالمبيت في بيت مغتربات الذي تديره (عايدة رياض) التي تحب سائق التاكسي حباً صامتاً

حاولت نجوى في اليوم التالي الوصول إلى تهاني وذهبت إلى المدرسة التي كانت تعمل بها أخر مرة دون الوصول إلى أي معلومة تفيدها في بحثها ثم زارت شقة يحيى مرة أخرى للبحث عن أي شيء يدلها على طريقها الذي رفض مساعدتها في بادئ الأمر وعندما تلمس تلقائيتها وجهلها بالقاهرة بعد تعرضها لشجار نشب بينها وبين شاب مستهتر صفعها على وجهها فتشاجر معه يحيى دفاعاً عنها وهي مغيبة من هول ما حدث لها غير مصدقة أخلاقيات العاصمة

تلامس شرارة الحب الأولى قلب تهاني في كدر أكثر من رائع، نرى بعيونها يحيى على دراجته البخارية وكأنه فارس أحلامها على صهوة جواده، وأثناء وجودهما في مطعم يتغزل يحيى في محيا نجوى لتقدم غادة عادل اروع أداء تمثيلي صامت يعبر عن خجلها وتوتر مشاعرها غير مصدقة ما تسمعه … هل هي هذه الفتاه التي يقال لها هذا الكلام؟ ولا تستطيع اللحاق بالقطار للمرة الثانية بعد حدوث حالة ولادة لسيدة في حمام محطة القطار وبالتالي لا تدرك قطارها

تعود إلى بيت المغتربات مرة أخرى، وبعد تأكدها من مشاعرها تجاه يحيى، تسعى للوصول إليه في بيته أو عمله دون جدوى، وهو كذلك يذهب إلى بيت المغتربات ولا يعثر عليها ويزداد إيقاع الفيلم سرعة وسخونه لتشعر بالخوف على الأبطال من أن لا يكلل حبهما بالنهاية السعيدة

يعثر عليها يحيى وهي في التاكسي متجه لمحطة القطار ويركبا معاً على دراجته البخارية متجهين إلى محطة القطار ويعطيها رقم هاتفه النقال مودعين بعضهما بنظرات تحمل كل معاني الحب في نهاية مفتوحة للمشاهد

يعد هذا الفيلم بالنسبة لمخرجه محمد خان أقل من مستوى "زوجة رجل مهم" أو "أحلام هند وكامليا" لكن بمقاييس سنة الإنتاج يعتبر من أفضل الأعمال السينمائية لهذه السنة، وأوقع الفيلم غادة عادل وخالد أبوالنجا في مأزق، فماذا يستطيعان أن يقدماه بعد هذا العمل الجيد؟

نرى شخصية السيناريست وسام سليمان واضحة في الفيلم وأن لها أسلوبها السهل الممتنع في تقديم المشاعر بتلقائية شديدة كما كان في فيلمها الأول "أحلى الأوقات" إخراج هالة خليل والثاني "بنات وسط البلد" إخراج محمد خان ، وما يأخذ عليها حتى الآن انها لم تقدم سوى أفلام تعتمد على البطولة النسائية وإن كان هذا ليس عيباً كبيراً مقارنة بأفلام السوق التي تكتب فقط للرجل، حتى فيلمها القادم أيضاً سيكون بطولة نسائية كما ذكر خان في ندوته التي اعقبت الفيلم

ما يؤخذ على الفيلم هو عدم الاستخدام الجيد لأغنية ليلى مراد "أنا قلبي دليلي" كلمات أبو السعود الإيبياري ولحن العبقري محمد القصبجي وقد لا تصدق أن من قدم هذا اللحن المبهج هو من قدم لأم كلثوم "رق الحبيب" وأكتفى خان بتقديم الأغنية بصوت ريهام عبدالحكيم مع الدعاية الخاصة بتسويق الفيلم دون أن يستثمرها بشكل جيد في مشاهد متعددة كانت تستدعي وجودها على شريط الصوت أو مع تيترات النهاية وخصوصاً إنها الغائب الحاضر والمحرك الرئيسي للأحداث من خلال بحث نجوى عن تهاني إلى أن تجد ما كانت تبحث عنه فعلا … الحب
وفي النهاية يبقى الفيلم حالة رومانسية يتحدث عن الحب دون أن يقول طرف للآخر كلمة … أنا بحبك

واجب

الموضوع ده كان وصلني عن طريق مدونة

Angel Love

والشكر لها لأنها اعتبرتني من المدونين اللي تمرر لهم الموضوع ده على اعتبار انها فرصة إن كل واحد يتكلم عن نفسه بشكل أوسع شوية وبالتالي الناس تعرف بعضها اكتر وأكتر وده واضح جداً من السؤال الأول لان لما حد يتكلم عن 16 صفة فيه أكيد مش هيكون فاضل حاجة تانية يقولها، على العموم هحاول أجاوب وافتكر الـ 16 حاجة دوول وربنا يستر يطلوعوا زي ما يطلعوا … مش هتفرق حتى لو هجيب 50% ودلوقت اتوكل على الله وادخل في الموضوع بقلب جامد

أذكر 16 صفة عن نفسك ؟

أبدء منين أممممممممممم
1
اعتقد إني مهذب وبيقولوا إني عنيد بس طيب والله
2
بحب أووي أعرف ماهية الأشياء يعني اعرف الحاجة جاية منين وراحه فين ولو ليا دور فيها ابقى فاهم دور التروس اللي قبلي والتروس اللي بعدي
3
أصحابي مش كتير أوووي إنما اللي مصاحبهم علاقتي بيهم مؤثرة بالنسبة ليهم وليا
4
اعتقد إني فيررر وممكن أقبل الرأي والرأي الاخر يعني مش متعصب لوجهة نظري ولو اقتنعت عندي الشجاعة الكافية إني اعترف بخطأي وأغير موقفي
5
بحب الشطرنج أووي واخدت جوايز فيه على ادي يعني وفي كمان مرات كتير مطلعتش الأول مثلا السنة اللي فاتت طلعت الرابع على 46 متسابق وكان في بينهم 8 مصنفين من اتحاد الشطرنج ، وانا مش كاسباروف ولا حاجة أحسن حد يفكر أني جامد أووي … وعلى فكرة كاسباروف مش هو بطل العالم دلوقت أنما انا بحبه أكتر واحد علشان له موقف وصاحب قضية
6
دايماً عندي هَم عام شاغلني حتى لو مش قادر يكون ليا دور فيه أنما مهموم بيه
7
أسعد لحظاتي في العطاء حتى ولو ابتسامة في وجه طفل … كل ميسر لما خلق له
8
بحب المالديف أوووي ، وفي علاقة ما بيني وبين البحر … هتصدقوني لو قولت لكم مش عارف اوصف شكل العلاقة دي؟
9
أحب يكون لكل موقف أصل منطقي عندي علشان أكووون رأي بغض النظر عن انه صح أو غلط انما يكون ليا مبرر … اختارت ده ليه
10
عارفين في اغنية بتاعة هنيدي في فيلم "اسماعلية رايح جاي" لما بيقول فيها أنا نفسي أبقى نفسي الخ … المهم يعني أهو أنا بقى "نفسي ابقى نفسي" دي
11
بحب لون الأورينج اوووي وأظن ده واضح في البلوج مع إني مش من النوع المتفائل دايماً
12
بتعامل مع الناس بحسن النية إلى أن يثبت العكس
13
بحسب كل الاحتمالات قبل ما اخطي خطوة ويمكن ده على أد ما هو ميزة … ممكن يكون عيب
14
بالإضافة لحبي للسينما بحب الموسيقى اووووي ولها دور مهم أووي في حياتي لدرجة إن في ناس بتقول عليا لاسع علشان الشطحات الموسيقية اللي بحب اسمعها
15
مش هخبي عليكم زمان مش كنت بحب الورد يعني كنت أقول سباطة موز ولا أبوفروه أبرك لكن بعد كده حبيت الورد اوووي وبقى حاجة مهمة في حياتي … حتى شوكه اتعلمت احبه
16
اه في حاجة كمان قبل ما أنسى بحب قبل ما أدون موضوع لازم أقرا فيه الأول بحيث أن يكون كلامي مبني على أسس زي مثلا قصة قصيرة كنت بتكلم فيها عن النحل اسمها "شهداء بلاط الملكة" وعلشان معلوماتي مش كبيرة في الموضوع ده قريت عن النحل كتير اوووي علشان مقولش أي كلام وخلاص


السؤال الثاني تمرر الواجب لمين؟

مش هختار حد معين اللي عايز ياخده يتفضل لاني تقريباً لقيته في اكتر المدونات اللي شوفتها … لكن في كلمتين أحب أقولهم بالمناسبة السعيدة دي لان الكلمتين دول لهم علاقة بكل اللي فوووووووق ده

دايماً في نماذج من الشخصيات مبتتكررش كتير في حياة كل واحد فينا وممكن تيجي في العمر كله مرة واحدة ممكن تكون "عم ـ خال ـ مدرس ـ جار ـ حبيب ـ صديق" وبيكون وجودهم مؤثر في حياتنا ولحظة فارقة فيما قبل وما بعد، عاملين زي مكتب التنسيق كده مثلا … أكيد الناس دي مش بننساهم وبيفضلوا دايماً جوانا لكل اللي عملوه علشانا … أحب أقدم لهم أغنية عبدالحليم … أعز الناس

نـــور

ـ أوكي يا جماعة ممتازين، بكرة إن شاء الله نفس الحماس يبان على خشبة المسرح سواء أوركستر أو راقصين قدام الجمهور، محتاجين كل طاقتكم وإبداعكم، العرض مهم وفي شخصيات مهمة هتحضر الافتتاح إن شاء الله ، دلوقت مفيش حاجة تعملوها غير إنكم تروحوا تناموا… أوكي سلام

تحدث جلبة بين الفرحة بانتهاء البروفة الجينرال والترقب والخوف من الافتتاح، الكل يأخذ طريقة إلى خارج المسرح، الراقصون لحجرات ملابسهم والعازفون كل منهم يضع آلته في جرابها بمنتهى الرفق كأنه يغطي أحد أبنائه في ليلة شتوية كهذه

ذهبت إلى غرفة البطلة في صمت شديد بعد البروفة التي لم تقنعها لشعورها بالذنب من عدم صفاء ذهنها المشتت وهي تؤدي بطولتها الأولى … كارمن

دقات صديقتها على الباب، أثناء خروج أفراد الفرقة عائدون لبيوتهم

ـ أنت لسه بالملابس يا ضحى؟
ـ معلش سرحت شوية
ـ طب يلا … مش هتوصليني في طريقك ولا أيه؟
ـ معلش روحي مع أي حد تاني النهاردة، عايزة أقعد لوحدي شوية
ـ أوكي باي، وصوتها يتباعد وهي مسرعة، بس متقعديش كتير علشان الافتتاح بكرة ولازم تنامي كويس
ـ بصوت لا يسمعه غيرها، حاضر

استشرى الهدوء ولم يتبقى سوى بعض العمال، خرجت بملابس كارمن متوجه إلى المسرح، ووقفت في وسطه تريد أن تعيد بعض الرقصات التي اعتقدت إنها لم تكن بالشكل المرضي لها … أغمضت حواسها جميعاً، ثم بدأت تسمع صوت الموسيقى تعزف بداخلها … وفي أصعب اللحظات من جلدها للذات، قدمت أرفع أداء تدريبي لها … وما كان هذا ليقنعها، لولا تمكن الإجهاد منها فجلست وسط المسرح متقوقعة داخل مشاعرها

همهمات لصدى حوار تحفظه عن ظهر قلب

ـ سافري يا بنتي مع خطيبك صدقيني مش هيحصل لي حاجة
ـ مش ممكن يا ماما لازم تيجي معانا، صدقيني كندا هتعجبك أنا شوفتها قبل كده مع الفرقة لما عرضنا هناك
ـ صعب عليا يا ضحى أسيب مصر وأنا في السن ده، أنت لسه صغيرة وتقدري تبدئي حياتك في أي مكان
ـ مقدرش أسيبك يا ماما، ولازم أكون جنبك حتى علشان الأدوية بتاعتك ومواعيدها
ـ هعرف أدبر أموري
ـ ماما بليز وافقي
ـ بصوت مقتضب … ضحى أنت هتسافري معاه علشان هو هيبقى جوزك ومن حقك تروحي معاه في أي مكان في الدنيا، أنا كمان من حقي أفضل جنب أبوك المدفون هنا لحد ما يجي يوم وأدفن جنبه
ـ بروح الدعابة … متقوليش كده يا ست الكل أنت هتعيشي إن شاء الله لحد ما تجوزي ولاد ولادي

تستمع بعد ذلك أصداء صوت ذكوري يقول لها

ـ ضحى لازم تيجي معايا دي فرصة عمرنا، وممكن نحل مشكلة طنط بإننا نخلي حد يقيم معاها في البيت علشان يراعيها
ـ أزاي يا ماهر تقول كده أنت مش عارف الحوادث اللي بتحصل الأيام دي
ـ هي مش عايزة تسافر معانا ، أوكي ... في بديل تاني قدمنا؟
ـ دون أن تضع عينها في عينيه… مش ممكن تلغي فكرة كندا دي وتاخد الدكتوراه من هنا
ـ طبعاً لأ … مين تكون عنده فرصة يسافر كندا وياخد دكتوراه منها وخصوصاً لو باحث كيميائي، وأنت عارفة البحث العلمي هنا ماشي ازاي ومفيش إمكانيات، وصعب جداً تطلبي مني محققش حلمي علشان طنط عايزة تموت وتدفن هنا
ـ ماهر بليز متتكلمش على ماما بالطريقة دي، مش من حق حد يسخر من أحلام حد تاني مهما كانت تافه أو بسيطة، هي شايفة أن الدنيا لا تعني لها غير شوية التراب اللي هيقربوا بينها وبين واحد عاشت عمرها كله بتحبه، أنت مشوفتش ماما وبابا كانوا بيحبوا بعض إزاي
ـ واضح تأثرك بكتب الفلسفة اللي في مكتبتكم
ـ دي أجمل حاجة ورثتها عن بابا، ومقدرش ألومك لأن حياتك كلها معادلات ونتائج، ولو روحنا كندا مش هنرجع غير للزيارة، وهتبقى هجرة

ـ وفي أيه هنا نبكي عليه، الدكتوراه ومستقبلي العلمي هناك حتى مستقبلك في البالية أفضل هناك
ـ شوف يا ماهر … إحنا حبنا جميل لكنه مش هيعيش لو ظلمنا حد في طريقنا، دايماً هيكون عندي إحساس بالذنب ناحية ماما بسفري معاك، ودايماً هيكون عندك إحساس بالذنب لو لمحت نظرة حزن في عينيا على ماما … وهيفضل سر عذبنا ضميرنا الحي
ـ بإيماءة تأكيد… نعم يا ضحى
ـ سافر يا ماهر … وأنا هفضل هنا جنب ماما
ـ يعني أيه
ـ مع إن حبنا كبير … لكن ظروفنا أكبر

رفعت رأسها على صوت اثنين من العمال يتهامسان … إحنا قربنا على الفجر، هي مش هتروح ولا ايه؟

نزلت من المسرح واتجهت إلى حجرتها وبعد دقائق خرجت منها مرتديه تنوره سوداء وجاكت جلدي أسود تخفي تحته كنزة حمراء، وخطواتها المثقلة تتقاذف ذكرياتها، وتلعن الصراع الدائر بداخلها … هل أخطأت حينما فضلت البقاء مع أمها وتركته يسافر وحده أم فعلت الصواب ؟؟؟ ظل السؤال يبحث عن إجابة دون رد

ركبت سيارتها مغادرة دار الأوبرا وسرعتها لا تزيد عن الأربعين كيلومتر فالشوارع خاوية في ذلك الوقت من الليل، عندما وصلت إلى منتصف كوبري قصر النيل توقفت بسيارتها ثم نزلت منها لتطل على النهر، فكثيراً ما يؤثرها إنكسار الأضواء على صفحة النيل كآمالها

لفت نظرها جريان مياه النيل القادمة من بعيد في اتجاهها لتمر من أسفل قدميها إلى الجانب الأخر من الكوبري مستمرة في الجريان لا يعيقها شيء، وتذكرت قول الفيلسوف اليوناني هرقليطس "إنك لا تستطيع أن تنزل النهر مرتين لأن مياه جديدة ستغمرك باستمرار" فإن الحياة لا تتوقف ويجب أن تستمر كمجرى مياه النيل، ولمعت عيناها على أمل جديد تحيى من أجله

نور … ينبعث من رحم معاناتها، لقد اهتدت إلى ضالتها، إن عملها في الأوبرا هَمُها الآن، إنه النور المنبعث من داخلها، ستولد نجوميتها الليلة وسيعطيها المسرح كما تعطيه وسيمنحها نوره كما تمنحه جهدها، وستحمل لياليه أسمها ويخلد ذكراها … إنها بطلته وهو حياتها

نظرت إلى يسارها وجدت شروقاً يبدأ من جديد … ابتسمت وركبت سيارتها منطلقة إلى بيتها، فإن لديها عمل هام يجب أن تنجزه الليلة

دقات على باب البطلة

ـ ستارة ، خمس دقايق على الستارة

تأخذ طريقها إلى خشبة المسرح وابتسامة الثقة تملئها، رغم حالة القلق والترقب على كل أعضاء الفرقة

تسمع دقات المسرح، ثم تفتح الستارة

تمت

المدونون قادمون

تحت عنوان مدونون مغتربون بجريدة الأهرام يوم الجمعة 20/6 عدد 44391 كتب السيد ياسين مقالاً حول المدونون وكيفية دراسة هذه الظاهرة؟ مفتتحاً مقالته بوصف المدونون بالمتعجلين في الخروج من الظلال الكثيفة وقرروا أن يقفوا بكتاباتهم تحت ضوء شمس، وتأكد لديه انطباع أن أغلب هذه المدونات تتسم بالركاكة في الأسلوب وفقر المضمون والعبثية، لكنه أشاد بمدونة أحمد شقير حكاوي آخر الليل بعرضه لذكرياته عن الوطن برسم لوحة مليئة بالتفاصيل الاجتماعية والثقافية المصرية

وتابع ياسين بسؤاله حول كيفية تحليل المدونات بطريقة علمية؟ من خلال نظريات علم الاجتماع في ربط النص بالسياق الذي أنتج فيه، مبيناً أن ظاهرة الاغتراب التي عمت المجتمع وأفقدت الشباب انتماءه تعود إلى حالة الانتقال التي يمر بها المجتمع المصري

واختتم ياسين بأهمية دراسة التدوين والمدونين، وهذا ما بدءوه في إطار المرصد الاجتماعي بالمركز القومي للبحوث الاجتماعية والجنائية

ويوجد هنا تساؤل يفرض نفسه، لماذا كل هذا الهلع من المدونين؟ إنهم لم يجدوا وسيلة أخرى غير التدوين ولم يلجئوا إليها، كل الأبواب مغلقة ولم يشعر أحد بهم إلا بعد أن حققوا نجاحات كبيرة عندما قامت بعض دور النشر بإصدار بعض الكتب لهم، واستطاعوا أن يخرجوا من ثقب الباب وتحول حلمهم إلى حقيقة

وما هو السر وراء كل هذا الاهتمام ، هل بقيمة ما هو منشور… أم بحجم المبيعات ؟ أعتقد أن الكثير من الأقلام التي هاجمت المدونين بوصف تدويناتهم بالركاكة والسطحية وأن ما يقدمونه ما هو إلا انطباعات شخصية وتفتقر إلى النظرة الموضوعية، وإذا كان هذا صحيح كيف أصبحوا هم كتاب كبار وأصحاب عواميد في الصحف الكبرى … هل ولدوا هكذا عباقرة؟ أم بدءوا من حيث بدء المدونون بالخواطر والمواقف الذاتية ثم تطور أسلوبهم وتم ثقل مواهبهم … فلماذا يضنون على المدونين بمجرد حقهم في المحاولة؟؟؟

والجانب الأخر من السؤال، وهو هل الاهتمام بالمدونين نظراً لحجم المبيعات؟ ربما يعود ذلك إلى خوفهم وشعورهم أن البساط يسحب من تحت أقدامهم لأن قراء هذه النوعية من الكتب هم القوة الشرائية الحقيقية في سوق الكتاب، وعندما أقبلوا على هذه النوعية من الكتب، لشعورهم بأنهم يرون أنفسهم فيها وأن المدون واحد منهم وربما يجلس بجوارهم في نفس المدرج بالجامعة أو زميلهم في العمل، فالمعاناة التي يعيشها المدون والمتلقي واحدة، بعد جحود الأجيال السابقة لهذا الجيل وتسفيه أفكاره، وهذا ليس بجديد لأن الصراع الأزلي بين الأجيال سنة الحياة

وإذا أراد أحد قراءة الأحداث جيداً، فإن مع كل تطور تكنولوجي " للميديا" تحدث طفرة نوعية، ولدينا مثال مع ظهور التليفزيون في بداية الستينات حدثت طفرة هائلة في المسرح وتواصل مع الطبقة الوسطى المزدهرة بعد ثورة يوليو لتحاكيها وتعرض مشاكلها، ومن نجوم هذه الميديا الجديدة فؤاد المهندس وعبدالمنعم مدبولي ومحمد عوض وأمين الهنيدى وأبو بكر عزت وشويكار

وفي تطور آخر "للميديا" بعد غزو شريط الكاست كوسيلة انتشار للمطربين خارج نطاق الإذاعة، ظهر حميد الشاعري في نهاية الثمانينيات ليقدم شكل غير مألوف للأغنية العربية وتبعه جيل كامل من المطربين ومنهم عمرو دياب ومصطفى قمر وهشام عباس وإيهاب توفيق

وبالتالي سيخرج المدونون أيضاً إن شاء الله من تحت مظلة الإنترنت، وإذا كان المدونون متعجلون في الخروج من الظل كما يقال … فمتى يستطيعون الخروج بكتاباتهم ليأخذوا مكانهم تحت الشمس؟ إنهم يكتبون لأنفسهم ويقرءون لأنفسهم، وإن كان هناك مدونات ركيكة ـ ولا أستثني نفسي منهم ـ فليمنحوهم الفرصة لتطوير مهاراتهم، حتى تصبح أقلامهم قادرة كجيل جديد أن تناظر من يعتقدون أنهم يملكون الحقيقة المطلقة

محطة الرمل

إهداء: إلى السكندري
يوسف شـــاهين
-----------

انتهى من إفطاره مع أصدقائه الثلاثة في صباحٍ صيفيٍ مشرقٍ بأحد مطاعم محطة الرمل، واتفقوا على أن يذهبوا إلى قلعة قايتباي المقررة في برنامجهم السياحي لمدينة الإسكندرية التي يزورنها لأول مرة، ووسيلة انتقالهم للقلعة الترام، معتبرين أن ركوبه نزهة في شوارع الإسكندرية القديمة، كان هو صاحب الاقتراح لعشقه الشديد للتفاصيل ، البيوت، الشوارع، المحلات، الناس، سيشبع الترام رغبته هذه بسرعته البطيئة، دائماً يهيم في خبايا الناس وما تحمله تلك النظرة العابرة على الطريق من انطباع يأخذه لبعيد

أسرع مع رفاقه ليركبوا الترام، بعض المقاعد الخالية هنا وهناك في عربة الترام، جلس كل منهم في مكان، وبقي بعيداً عنهم في وسط العربة على الجانب الأيسر منها، تحرك الترام متجهاً إلى القلعة غرب المدينة الممتدة على ساحل البحر المتوسط، مغادراً محطة الرمل وما أن تجاوز الرصيف بقليل إلا وتوقف في إشارة مرور مزدحمة

تجول بعينيه من الشباك المجاور على يساره، وجد ترام آخر متجه شرقاً في الاتجاه العكسي توقف في إشارة المرور ذاتها، وحجب عنه الرؤية إلا من خلال شبابيكه التي تسمح له برؤية ضيقة لشارع صفية زغلول، تراجع بعينيه إلى عربته ثم أختلس النظر للجانب الآخر من الشباك الأيمن المطل على البحر، يرى منه مياهه الزرقاء وأمواجه المستأنسة بعد تحطمها على حواجز الأمواج، قابعاً في قاعه آثار المدينة الغارقة

عاد من جولته البحرية إلى الكورنيش قائلاً لنفسه: مشى هنا على هذا الرصيف سيد درويش وبيرم ورايا وسكينة، حتى "عيسى الدباغ" بطل رواية "السمان والخريف" لنجيب محفوظ كان يمشى هنا وجلس تحت أقدام تمثال سعد زغلول الموجود في وسط الميدان، وتحركت عينيه إلى الشبابيك الأمامية على اليمين ليرى منها تمثال سعد باشا شامخاً، وجهه للبحر تاركاً المدينة خلف ظهره، وكأنه يأبى أن ينظر إليها أسفاً على ما آل إليه حال أحفاده

سمع صوتاً قادماً عن يساره من شارع صفية زغلول زوجة الزعيم الراحل قائلاً

ـ متزعلش يا باشا

تحول مسرعاً إلى مصدر الصوت باحثاً عنه من خلال شبابيك الترام المجاور له، كان قادماً من أروقة شارع صفية زغلول، عاد مرة أخرى لتمثال الزعيم يسمعه يقول

ـ مش شايفة يا هانم حالهم، هو دا المستقبل اللى حاربنا علشانه ونفاني الإنجليز من أجله
ـ الأيام غير الأيام يا باشا، وأنت شايف الحياة صعبة، حياتهم كلها أزمات
ـ لازم يكون عندهم عزيمة ورغبة في التغيير، مش هم دول أولاد المصريين اللي قاموا بثورة 19
ـ نعم يا باشا
ـ طيب فين حماسهم ولا هي كانت مجرد رغبة في الاستقلال وخلاص
ـ عندك حق يا باشا
ـ أيه اللي حصل لهم
ـ الجري ورا لقمة العيش، وفي أسباب كتيرة أكبر منهم بتدور حواليهم، العالم أتغير يا باشا
ـ لازم يحاولوا يبنوا البلد من جديد علشان تقف على رجليها ياهانم
ـ أكيد المستقبل هيكون لهم إن شاء الله ، خليك هادي، تعالى نشوف إشارة المرور الطويلة هتفتح أمته يا باشا

وبعد متابعته لأخر كلمة قالتها صفية زغلول، عاد بنظره من خلال الترام المجاور له، ووقعت عيناه على يداً يسرى ممسكة في المقابض العلوية للسيطرة على ثباتها وهي واقفة، يداً بيضاء تفيض بالأنوثة نزل معها بعينيه من أعلى إلى أسفل حتى وصل إلى مرفقها متجها يساراً متأملاً صاحبتها

بدراً يكسوه شعراً كثيفاً ناعماً متدلي على الكتفين، عينان سوداوان شفتان براقتان وجنتان ورديتان كأنها عروس البحر، تلاقت أعينهما وهو شاغراً فمه من روعة ما رأى، ابتسمت له ابتسامة تملؤها الثقة بالنفس والشعور بالزهو، تردد في ابتسامته خجلاً متخيل أنها سمعت الحوار الذي سمعه، أستجمع شجاعته وانطلقت ابتسامته العريضة، وتحولت نظراتهم الأولى من الاندهاش إلى الإعجاب، كل منهما بالطرف الآخر، دار حواراً صامتاً بينهما فقط بالأعين

وفجأة تمايلت إلى الخلف كجذع نخلة مع باقي ركاب الترام في حركة تشير إلى أن ترامها سيتحرك إنذاراً بانتهاء إشارة المرور، ترقبها بهلع لعدم رغبته في انهاء اللقاء، نظرت له مواسية، قائلة بعينها إن طريقنا ليس واحداً، ولابد أن يذهب كل منا في طريقه، بدأت علاقتنا في إشارة مرور … ويجب أن تنتهي في إشارة مرور

أغمض جفونه موافقاً، ثم فتحها مودعاً رافعاً يده اليمني ملوحاً لها بأصابعه مع السلامة، عادت لابتسامتها المستكينة الراضية رافعة يدها اليمنى ملوحة مع السلامة، ومضى كل منهما في طريقه

توجه لمحطته التالية غرباً
وتوجهت لمحطتها التالية شرقاً

سمع تنهيده من صوت بعيد يتخلله الشجن

ـ أحفادك لسه حبهم جميل يا باشا

لمح سعد باشا من خارج الترام المتحرك بسـرعة بطيئة جعلته يرى الجانب الأيسـر من التمثـال، يرد عليها … مطأطئاً رأسه