تاج التدوين

بعد 6 شهور من التدوين أعتقد إن التاج ده وصل في وقته لتقييم التجربة والوقوف مع الذات وخصوصاً إن محاور أسئلته كلها بتتعلق بالتدوين ، ووصلني التاج عن طريق مدونة ساعات ساعات وسعدت جداً بالتواصل ده بين المدونين وبعضهم.


1- بدأت تدون امتى … ودخلت العالم دا ازاى؟

بدأت التدوين من 6 شهور زي ما هو واضح من تاريخ أول بوست إنما كان في حاجات كتيرة كتبتها قبل كده والبدايات كانت في النقد السينمائي لأني أحب السينما أووي وبصراحه كنت بشوف ناس بتكتب حاجات مفيش لها علاقة بالفيلم على الإطلاق وبيعتبروا نفسهم نقاد لدرجة أني كنت بتخيل أنهم بيتكلموا عن فيلم تاني غير اللي شوفته ، وكان لي مشاركات أتنشرت على موقع الـ BBC وده طبعأً كان بيتعلق بموضوع الساعة وإذا كان الموضوع المطروح يثير فضولي للمشاركة بالرأي فيه.

وبالنسبة للنص التاني من السؤال … دخلت التدوين ازاي ؟ شوفوا من حوالي سنتين أو أكتر شوية … ألح عليا (س) من الناس بخصوص الفكرة دي بعد ما قرا حاجات كتبتها وكانت الظروف مش بتسمح أو الحماس بيفتر لحد ما جت اللحظة المناسبة وعلى ايد نفس الـ (س) وإصراره إنه يدفعني للتدوين دفعااااااااا وهو كان مؤمن باللي بكتبه وشايف ان فيه حاجة والحمد لله حسيته ده من تعليقاتكم على المواضيع المختلفة … والفضل كل الفضل يرجع للـ "السين" ده في إني بقيت وسطكم هنا.

2- ايه كان انطباعك فى البداية؟

في البداية كنت متوجس خيفة من عدم الانتشار ومدى صعوبته وإني أكون بكتب لنفسي ، ومش معنى كلامي ده أني بقيت علم من أعلام التدوين … أبدا بالعكس في مدونات بروحها ما شاء الله على زورها وانا يدوب أهو في البداية الحكاية كلها 6 شهور لا أكثر ولا أقل، وطبعاً كنت بفرح جداً بأي حد يدخل المدونة ويا سلام لو ساب تعليق على موضوع بكون سعيد جدا … وأكتر حاجة بتسعدني لما يدخل حد جديد المدونة لأول مرة ويعلق على موضوع بحس ساعتها إني كسبت أرض جديدة.

3- مين اكتر واحد بتهتم بتعليقه على بوستك الجديد؟

كل التعلقيات بهتم بيها جدا وبيسعدني التعليق اللي يدل على قراءة واعية ومتأنية للموضوع سواء اختلف أو اتفق معايا في الرأي وإثارة حالة من الجدل بتعتبر نجاح للموضوع سواء مع أو ضد.

4- ايه اهم حاجة اتعلمتها من عالم التدوين؟

التواصل مع المدونين والتفاعل الإيجابي في الفرح أو في الحزن والمشاعر فعلا بتكون صادقة وإن التدوين بدأ يخرج من العالم الافتراضي لأرض الواقع زي مشروع مدونات مصرية للجيب وبؤجة الخير والتفاعل بشكل إيجابي مع اللي حصل في الدويقة وشوفته في مدونة امرأة بعقل رجل والفطار الجماعي في رمضان مع خالد الصاوي في مدونة عندليبيات … كل دي أشكال من التواصل الإيجابي.

وعرفت ناس جامدين اووي زي عبقري الموسيقى الشندويلي صاحب المدونة المتخصصة في الموسيقى التصويرية وفي السينما مثلا في مدونات زي بحب السيما ومدونة 35مم بس صاحبتها مش بتنزل جديد من مدة معرفش ليه ومدونة غريب وطبعا قربت كتير من الفن التشكيلي عن طريق مدونة جاليري وبدأت أفهمه لأني كنت بحبه وبتذوقه بس مش عارف ازاي أفهم أبعاده، وأشعار مدونة عالم الخيال، ومدونة رحايا العمر دايماً تهتم بالحوار مع الذات وتدعيم القيم الإيجابية وتنمية المهارات وكأنك في ندوة للدكتور إبراهيم الفقي، ومدونة طائر النار تحس ان الهدف واضح عندها وبتوصل للهدف بأقصر الطرق ومدونة نبع الأمومة روح قلب ماما ومدونة أنا اللي بالأمر المحال أغتوى مدونة جميلة جدا ومدونة إمرأة بعقل رجل تحس أن في ثراء في مصادرها ومدونة عايزة أتكلم القوة الدافعة لمدونات مصرية للجيب وصحفيتنا اللامعة دعاء مواجهات ، ونضوج التجربة في مدونة راجي ومدونة لقاء الأحبة اللي أول ما تدخلها تشعر بالسكينة والإطمئنان ومدونات بنانيتي خالص زي برينسيس بيري وساعات ساعات و انجيل وإعلامي المدونات خالو أحمد الصباغ ، ومن المدونات اللي دمها خفيف الرائعة والمتجددة دائماً آبي وكمان شفقه وإحسان واللي مشيبة البلوجرية كلهم كيكي وهختم طبعاً أديبنا الكبير مصطفى ريان الثائر بتاع الرباعيات الجاااامد.
وبصراحه خايف أنسى حد أنما عموماً كل حد مدونته موجودة عندى في قايمة الحرافيش اكيد هو حد بحب أتابع مدونته.

5- ايه اكتر حاجة كرهتها؟

تعليق "غير معرف" … إنه حد معندوش الشجاعة الكافية أنه يقول رأيه في العلن ودايماً يا بيقول كلمتين بيعبروا عن البيئة اللي هو جاي منها … أو نموذج تاني من "غير معرف" يدخل بيعمل اعلان لموضوع ما مثلاً ويجري

بعض المدونات اللي تختلف معها في الرأي بيتجاهلوا رايك ومبيوضحوش وجهة نظرهم ويردو عليك … بس دوول اهون من نوع تاني ينزل عليك بالتجريح والإهانات لمجرد أنك قولت وجهة نظر متتفقش مع وجهة نظره

وأخيرا المجاملات المبالغ فيها في بعض الأحيان

6- حاسس ان التدوين له تأثير؟

طبعااااا كل كلامي اللي فووووق ده بيقول أن التدوين له تأثير كبير ومش بس على مستوى المدونين زي البعض ما بيتخيل لا بالعكس إحنا أثارنا اهتمام آخرين وفي برامج تلفزيونية وإذاعية بتابعنا وكتاب كبار كتبوا علينا وقالوا رأيهم في التدوين والمدونين … أكيد كل ده بيقول أن في تأثير … مش كده ولا أيه؟

وتأثيره على المستوى الشخصي ، أعتقد أنه في تأثير إيجابي بمعنى قبل التدوين كنت بدون على فترات متباعدة يعني لو جت في بالي فكرة أو شوفت فيلم عايز أقول رأيي فيه كده يعني وكنت كسول طبعاً لأني بكتب لنفسي ومفيش حماس وبشكل غير منتظم، إنما دلوقت الحمد لله بدأت أدون كل أسبوع موضوع جديد وأنزله في ميعاد ثابت أسبوعياً كل يوم تلات تيمناً بميعاد العمود الأسبوعي للأب الروحي إبراهيم أصلان لان ده ميعاده كل يوم تلات في الأهرام ، والراجل ده له فضل كبير عليا ونصحني مرة نصيحة بإني لازم أقرا كتيررر ودي حاجة مهمة لأي واحد بيدون أو حتى مش بيدون.

والحمد لله بدأت أظهر في جوجل بمجرد ما تكتب اسم المدونة وفي الصفحة الأولى يعني مثلا لو بتدور على اغنية علي الحجار "عارفة مش عارف ليه" هتبص تلاقي المدونة أول حاجة في الصفحة وده نجاح كبيررر بالنسبة ليا إني أكون مرآي على محرك بحث زي جووجل … ومخبيش عليكم فرحت أوي بيه

7- تهدى التاج لمين؟

أهديه لكل الناس اللي أسامي مدوناتهم جت في البوست وطبعاً الحرية متروكة للجميع في الجواب عليه.

اللهم تقبل منا رمضان

رمضان … والإعلام الموجه

كل عام وأنتم بخير لقد أهل علينا رمضان بنفحاته الطاهرة المباركة ونسأل الله أن يتقبل منا صيامنا وقيامنا وركوعنا وأن يعيننا على صالح الأعمال … اللهم أمين، أختلف رمضان عن ما كان عليه في عهد الآباء والأجداد، كان حالة روحانية تفيض بالذكر والخشوع وكل شيء يتم في يسر وسكينة ، يستقبل الأطفال هذا الشهر بالفرحة والابتهاج بلياليه العطرة.

أما الآن تحول لحالة من اللهث خلف البرامج التليفزيونية بداية من الفوازير والبرامج الترفيهية وصولاً للمسلسلات… والتي تحولت إلى عبء على المشاهد فكيف يتابع عشرات المسلسلات على مدار 24 ساعة ولو شاهد مسلسل كل ساعة لن يستطيع متابعة أكثر من 24 مسلسل فقط، وقطعاً العدد يتجاوز هذا الرقم في عصر الفضائيات المفتوحة وتنوع القنوات ومشاربها.

بعد تعاظم دور المسلسلات في حياة المشاهد تجده بعد المسلسل يتحدث مع أصدقائه وذويه عن تفاصيل الحلقة وماذا يمكن أن يحدث في حلقة الغد وفي الصباح تكون "قفشات وإفيهات" المسلسلات حديث الناس في طريقهم إلى العمل … وحتى في العمل تكون أيضاً محور اهتمام الزملاء ويتبارون في كم مسلسلات التي يتابعها كل منهم… ذلك كله جعل من المسلسل أداة شديدة الأهمية لتوفر قاعدة عريضة من المشاهدين.

يتم استخدام الإعلام لخدمة فكرة معينة في أي مجتمع كمحفز مثلاً في اللحظات الاستثنائية من تاريخه وذلك لاستثارة المجتمع للمشاركة في عمل جماعي يعود بالنفع على الجميع … لكن الأنظمة الشمولية تستخدم الإعلام بداعي أو بدون داعي في محاولة للردة والعودة إلى عقود انحصرت في عهدها دول بسبب هذه السياسات العقيمة، والتي مازالت مستخدمة بشكل واضح وفج مستهدفة تلك القاعدة الكبيرة من مشاهدي المسلسلات.

منذ عدة سنوات مضت كانت هناك بعض الحوادث الطائفية وفي ذلك الوقت تم تقديم كم هائل من المسلسلات الرمضانية التي تتناول أحداثها حقبة العشرينات مروراً بثورة 1919 من قريب أو بعيد لتدلل على الوحدة الوطنية في شكل أفقد الحدث قيمته وتأثيره على المشاهد من كثرة ترديد شعاراته … وقد سميت مسلسلات هذه السنة بمسلسلات الطرابيش.

رمضان الماضي 2007 كانت هناك قضية أخرى تناولتها المسلسلات بشكل ملحوظ وهي شخصية "رجل الشرطة" وذلك بعد حوادث متتالية يندى لها جبين كل شرطي شريف، ولا ينكر أحد دور الشرطة في حياتنا وحفاظها على أمننا ولا ننسى الضابط الذي أستشهد العام الماضي دفاعاً عن شرف فتاة ربما هي أختي أو أختك.

إنما ما حدث من توجيه للآلة الإعلامية والتزام بعض الأقلام بالطريق المرسوم لها من إبراز شخصية رجل الشرطة في أعمالهم الدرامية بشكل ملفت للانتباه … لنرى تلك الشخصية في أنماط متعددة بصورته الوردية المثالية من اللين والهوادة والرفق والرحمة والأكثر من ذلك مشاهد بعض الاستجوابات للمجرمين التي تتم بمنتهى الرفق … والشرطي الذي يسيء استخدام سلطاته في المسلسل يعاقب من رؤساؤه، ومن يتهم منهم بتهمة التعذيب زوراً على يد أفاق نجد ذلك الشرطي يتضرر نفسياًُ ويصاب بالإحباط مما يعكر صفو حياته المهنية والأسرية … كل ذلك للضغط على عقلية المشاهد لتحسين هذه الصورة .

هناك جملة تلح علي دائماً جاءت على لسان "صلاح السعدني" في فيلم "صراع الأحفاد" حينما قال "مشكلة العالم التالت خوف المواطن من رجل الشرطة".

وأخيراً … ترى ماذا ستتناول مسلسلات هذا العام على مأدبة رمضان 2008؟ أتمنى أن لا تتكلم عن رجال الأعمال الشرفاء وأهمية الاحتكار ودوره في تنمية الصناعات الوطنية.