‏إظهار الرسائل ذات التسميات Congratulations. إظهار كافة الرسائل
‏إظهار الرسائل ذات التسميات Congratulations. إظهار كافة الرسائل

الثلاثاء، 31 ديسمبر 2013

شكراً 2013


مع وزير الإعلام في دولة الكويت الشيخ الحمود الصباح وراعي جائزة للابن البار إبراهيم طاهر البغلي
بالرغم من كل الأحزان والآلام التي حملها في ثناياه العام المنصرم إلا أنه آبى أن يرحل دون أن يترك ابتسامة وهو مودعاً.
فقد حصلت على المركز الثاني في "جائزة البغلي للابن البار" للقصة القصيرة لعام 2013 ، بالتنسيق مع المجلس الوطني للثقافة والفنون والآداب بدولة الكويت عن القصة القصيرة "الدرج الرخامي" .. في الحفل الختامي لجائزة الابن البار في فندق كراون بلازا مساء الخميس الموافق 26 ديسمبر 2013 ، برعاية وزير الاعلام في دولة الكويت الشيخ سلمان الحمود الصباح الذي شهد تكريم الفائزين في مسابقات جائزة البغلي للابن البار والقصة القصيرة والتصوير الفوتوغرافي فضلا عن تكريم خمسة وعشرين شخصية بحضور راعي جائزة الابن البار ابراهيم طاهر البغلي وحشد من المكرمين .

بالرغم من كل شيء أقولها مودعاً .. شكراً 2013 J


الأربعاء، 7 أبريل 2010

وليد الزهيري … كلاكيت تاني مرة


العزيز - وليد
تحية خاصة من فريق عمل بيت المدونات العربية - فإن مدونتكم تحظى بمكانة خاصة و مواضيع مميزة.
شكر بسيط منا - لقد عرضنا رابط مدونتكم على جميع صفحات الموقع فى قسم المدونات المميزة

ده إيميل وصلني من موقع "بيت المدونات العربية" وحقيقي يا جماعة لما قريته استغربت أووي … ووصل الأمر لعدم القدرة على الاستيعاب … ولما استوعبت … مصدقتش نفسي، وقولت مش معقول الكلام اللي مكتوب في الميل ده، وبالفعل مكدبتش خبر ودخلت الموقع أشوف إيه الحكاية، لقيت على السايد بار قائمة بالمدونات المميزة ومدونتي واحدة من العشر مدونات المميزة

لكم أن تتخيلوا مدى سعادتي وأنا قاعد بتنطط على الكرسي من الفرحة وده لأني بأعتبر كينونتي الممثلة في مدونة "عارفة … مش عارف ليه!!!" كينونة متواضعة للغاية ولا تستحق هذا القدر من التقدير، وإني في واقع الأمر كنت بكتب قبل التدوين لنفسي فقط لأشباع رغبة داخلية لأني المستمتع الأول بممارسة فعل الكتابة … وده بغض النظر عن جودة النص أو ضعفه وبعد ما تطور الأمر للتدوين وبقى كل بوست هنا جزء مني وممكن أكون تألمت في لحظات مخاضه ـ جملة إعتراضية على السريع كده، كلمة "جزء مني " لا تعني أبداً إني بطل كل القصص القصيرة هنا لأني مثلا مشتغلش في سيرك زي قصة "كوباية شاي" ولا بعت "غزل البنات" وكمان معنديش "غية حمام" ـ الجملة الاعتراضية دي طلعت كبيرة اووي كأنها ـ فقرة اعتراضية ـ :$ ، ما علينا نرجع لمرجوعنا

بصراحة يا جماعة من الأخر، بعتبر نفسي كمدون مش متسيط أووي وغير منتشر على الإطلاق وده تقصير مني أكيد ومش بشتغل على تسويق المدونة بالقدر الكافي وكتير بيجيلي أحساس بالذنب لتقصيري في حقها، لكن الإحساس ده يعقبه غالباً استسلام للأمر الواقع، مردداً القول المأثور … فلنكتفي بهذا القدر

وبناءً على الفقرة اللي فوق دي … لما يجيلي ميل بالشكل ده بيقول إن مدونة "عارفة … مش عارف ليه !!!" تعتبر واحدة من المدونات المميزة … وإن الكلام ده جد مش هزار ـ ومش مجرد هلاوس موريستانية ـ لأ وأيه … الكلام جاي من موقع معتبر وحط تحت كلمة معتبر دي ميت خط لأنه موقع متخصص في عالم المدونات من كل الدول العربية … بالإضافة إن عدد زواره 100 ألف زائر يومياً، يعني كده يبقى … جول وجول وجوووووووووول

وتشاء الأقدار إن وصول الميل ده يتوافق تاريخياً مع تعامد أشعة الشمس على مدونة "عارفة … مش عارف ليه !!!" في نفس اليوم اللي شهد ميلادها من سنتين بالتمام والكمال، وكان في نفس ذات الوقت … السنة اللي فاتت في عيد ميلادها الأول نشر لي أول مقال نقدي في جريدة الوسط الكويتية وعلى مدار السنة بحمد لله تم نشر عدة مقالات نقدية أخرهم من يجي كام يوم كده في جريدة الآن الالكترونية، وطبعا مجلة ميكانو كان لها دور في حصاد السنة دي بعد ما نشرت لي قصتين قبل كده

ومما سبق … الحمد لله السنة كانت عامرة بنجاحات لا بأس بها يمكن تكون خطوات في سرعة السلحفاة إلا إنها خطوات … والحمد لله كُللت نهاية السنة بالتقدير اللي نالته المدونة من موقع "بيت المدونات العربية" وكل الشكر للموقع على تقديره ده، والشكر موصول لكم أنتم كمان لأنكم كزوار للمدونة ساهمتم في نجاحها ـ إن كانت حققت نجاح يذكر ـ واستمديت من تعليقاتكم القوة الدافعة للأمام … وكل الشكر لأي حد قرا كلمة هنا وتركت أثر جواه … وشكراً جزيلاً للحظة ميلاد فكرة إنشاء المدونة دي … واللي كانت سبب في إني أكون هنا دلوقت

الثلاثاء، 5 يناير 2010

استفتاء مدونات 2009


مع أخر يوم في السنة يوم 31 منه، ظهرت نتائج استفتاء المدونات لـسنة 2009 وكانت النتيجة معبرة عن رأي المشاركين في الاستفتاء ووجهات نظرهم في تقييم المدونات اللي بيزوروها ورأيهم في أصحاب المدونات دي وده يعتبر أفضل كتير من الاستفتاءات الجماهيرية ، لأن كتير مننا كمدونين لسه ملناش جماهير من خارج التدوين إلا فيما ندر طبعا، وبناءً عليه كانت النتائج صادقة ودقيقة إلى حد ما على اعتبار أنها جاءت من متخصصين يعني كده زي ما تقول مش جوائز مجلة فنية اعتمدت على نتائج القراء لأ دي أشبه ما يكون باختيار "كريستيانو رونالدو" كاحسن لاعب السنة دي لأن اللي بيختاره مديرين فينيين وفاهمين هم بيختاروا ايه وليه

وأعتقد أكتر جزئية في الاستفتاء بتعكس مدى وعي المدونين بالدور اللي بيقوموا بيه … وضح في اختيارهم لأهم الإحداث التدوينية لأن النتائج جاءت كلها معبرة عن "الخير الكامن" في كل واحد فيهم وكانت النتيجة على الترتيب الحدث التدويني الأول "البؤجة … و الحملة الخيخية للتبرع بالدم … وأخيراً الفطار الجماعي في رمضان يوم مستشفى أبو الريش"، وأفتكر إن اتفاق المدونين على أحداث تدوينية بالشكل ده يعبر عن معدنهم النفيس وإنهم مش مجرد شوية عيال لاسعه، لا والله دول رجالة ووقفوا وقفة رجالة زي بتاعة عمنا "محمد أبوسويلم" بدون شووو أو أي غرض دنيوي وكان تحركهم غير المنظم … منظم جداااا

وطبعاً اللي أبرز الدور ده وحط إيدينا عليه هو بسكوتة صاحبة الفكرة وتستحق عليها طبعاً تاخد براءة اختراع لأنها أعلنت عن الفكرة وتطوعت لاستقبال النتائج وفرزها … وحكاية "تفريغ الداتا" دي مش حاجة سهلة يا جماعة والله دي تخنق أتخن تخين … وطبعا كل ده علشان تظهر النتائج في الوقت المحدد وهو يوم 31 ديسمبر ومحدش يجي يقول بقى النتائج التأخرت ليه ونحاول نجيبها من الكنترول ولا حد يقولك أنا شامم ريحة طبيخ في اللجنة دي وهو أساساً تلاقي عنده برد … بن ابببارح

وعلشان الجهد اللي بذلته بسكوتة ده ميروحش سدى وجب علينا كمدونين التنويه عن نتائج الاستفتاء لإبراز دورها والمساهمة في نشر الفكرة علشان السنة الجاية بإذن الله تكون أفضل من السنة دي … لأن طبعاً التجربة لسه في بدايتها وأكيد ممكن يكون في سلبيات كتيرة واجهت التجربة وبدل ما نهدمها من أساسها نشتغل عليها ونطورها بحيث تكون النتائج السنة الجاية إن شاء الله معبرة عن المجتمع التدويني اللي لنا جميعا شرف الانتساب له

وفي وجهة نظر بالنسبة لموضوع النتائج ده وهو بغض النظر عنه إلا إنه يعتبر إشارة لمدونات بعينها ومدونين وكمان موضوعات مميزة في المدونات دي تعتبر خلاصة المدونات وإن كانت حكاية خلاصة دي مش دقيقة 100% لأن طبعا الاختيار كان بناء على رؤية المشاركين في الاستفتاء … ومن هنا … نطلع بنتيجة وهي إن النتائج دي ممكن نقول عليها "برشامة تدوينية" بما هو يستحق القراءة والمتابعة، ونعتبرها زي "دليل المشتاق … في دهاليز مترو الأنفاق" ، ودلوقت مع النتائج وهي نقلاً عن مدونة بسكوتة


---------------------------------------

بسم الله الرحمن الرحيم

القسم الاول : أفضل ثلاث مدونات

مدونات داخل المنافسة

اكتب بالهمزة - تظبيط - عجوز وعندي 30- رئيس جمهورية نفسي - صبرني يارب - الدنيا ريشة بقلم – جاليري - حكاوي اخر الليل - احمد الصعيدي - عنبر العقلاء- كله كلام - عقل مهوي - رسائل من الدوحة - ليس فقيرا من يحب - حكايات بوبو - احمد الجريدلي - حبشتاكانات فلسفية- بروميس - بعبة بلوجارية الرحايا - روح قلب ماما – سووووووو- مش عارفة بس نفسي اعرف - بت خيخة واي كلام - حنعيش يعني حنعيش - جبهة التهييس الشعبية - عارفة مش عارف ليه - فشكول دوت كوم - هل تبحث عن السعادة -فكك مني يامراكبي - لست الا بعض الاوراق – قوس قزح – أمة الله – Appy Planet– رئيس جمهورية نفسي

المدونات الفائزة

المركز الاول : روح فلب ماما
المركز الثاني : بت خيخة واي كلام
المركز الثالث : مش عارفة بس نفسي اعرف
المركز الرابع : حنعيش يعني حنعيش – جبهة التهييس الشعبية – عارفة ....مش عارف ليه
المركز الخامس : امة الله – فشكووول دوت كوم – هل تبحث عن السعادة – فكك مني.- عجوز وعندي 30
--------------------------------------------------
القسم الثاني أفضل ثلاث مدونين


مدونين داخل المنافسة

بوبو \ احمد القاضي يا مراكبي \ نوران – بت خيخة \ زيكا – المخرج \ ايوشة – تخارف واحاسيس ايوشةاحمد ابو العدل ماذا بعد \ احمد ابو العلا \ د\ ياسر \ مسدس صغير \ رحاب – Appy planet \ سارة من السعودية \ كاميليا \ د\ اسلام \ بروميس \ شيما الشعب لابد له من حكومة \ داليا قوس قزح \ صبرني يارب \ موناليزا \ محمد غالية \ د\ستيتة \ فاتيماRashid \ Isolde \ احمد كمال \ حنين القلب \ محاسن صابر عايزة اطلق \ لاسع افندي \ هعزف لنفسي \ راجية الرحمة \ احمد الصباغ \ عسقول \ احمد سووووو
أحمدK

المدونون الفائزون وفقا لعدد الاصوات

المركز الاول : د\ ستيتة
المركز الثاني : فاتيما
المركز الثالث : داليا قوس قزح و نوران بت خيخة
المركز الرابع : احمد القاضي يا مراكبي
المركز الخامس : رحاب ابي بلانيت - احمد ابو العلا - صبرني يارب

------------------------------------------------------

القسم الثالث أفضل ثلاث معلقين


معلقين داخل المنافسة

ابن حجر العسقلاني \ احمد القاضي – يا مراكبي \ د\ ستيتة \ تامر علي \ عمرو بدر \ فاتيما \ محاسن صابر \ احمد ابو العلا \ عادل اليلد دي فيها حكومة \ شريف باشا هجايص \ الكيت كات \ بدراوي \ حسن ارابيسك \ مصطفى ريان \ ليسندرا \ هاني حامد \ مهندس مصري \ مجداوية \ الفراغ \ ابن رشد \ واندا سواحة في الكون \ سكرة سكرة وبحر الحياة \ احمد الصعيدي \ ليس فقيرا من يحب \ احمد سعيد \ مهندس حر \ احمد عاطف \ قوس قزح \ وليد عارفة مش عارف ليه \ تاية في وسط البلد \ نوارة \ برومس \ شيما الشعب لابد له من حكومة \ واحدة مفروسة \ شريف لست الا بعض اوراقا \ مواطن شجاع \ تامر على الدنيا ريشة وقلم


الفائزون

المركز الاول: فاتيما روح قلب ماما
المركز الثاني : د\ ستيتة مش عارفة بس نفسي اعرف
المركز الثالث : عادل البلد دي فيها حكومة
المركز الرابع : احمد القاضي يا مراكبي و ليس فقيرا من يحب
المركز الخامس: تامر علي الدنيا ريشة وقلم .
---------------------------------------------------

القسم الرابع : افضل ثلاث بوستاااااااااااااات


هنا بقا مفيش مراكز نظرا لتنوع الموضوعات وساكتفي بذكر كافة البوستات التي تركت اثرا في عقول وقلوب المدونين والمدونات

العبر والدروس في اصول البحث عن العريس والعروس – الدنيا ريشة وقلم
سلسلة قلب – صبرني يارب
مراهقة الصبيان واللحظات الحرجة – بعبعة بلوجارية.
سلسلة تخاريف – د\ ستيتة
الساعة 6 من 6 سنين – حازم النبراوي
ضابط امريكاوي – سووووووو
حبيبة زوج – د\ ستيتة
مجرد راي – البلد دي فيها حكومة
قبض الريح – فاتيما
If I were مدونة sentimental prints
مين قال ان القمر بنوتة mimi
هناك فرق – ابداعات شاب ثائر
عم حميد – امراة بعقل رجل
مقاس جزمتي المحروسة ونفسيتي المهزوزة – تخاريف ايوشة
اخضر وباستك – بت خيخة واي كلام
حكاية غرامي – نبضات قلب ولهان
اللحظة الفاصلة – رحايا العمر
اصل في اتنين مصر – مجداوية
نص دقيقة – فاتيما
اجتماع جمعية المراة المتوحشة – د\ ستيتة
لو لم اكن .... لوددت.... الدنيا ريشة وقلم
من شلقط لملقط - هنعيش يعني هنعيش
اخر حدود السما – فاتيما
لساك فاكر –لافندر
هاتفرج – عقل مهوي
هذيان مراة – احمد الصعيدي
عيشها بشكل تاني – عيشها بشكل تالت
قالوا عن المراة – تخاريف مشكلة
البلد – كينج توت
انفلونزا الفرافير – حكايات بوبو
لسة انسانة – انسانة
البشرية هتخسر ايه – تظبيط
اغتصاب – تخاريف ايوشة
الاسلام واحكامه في ظل الانتقادات الساذجة – مجرد حالة
اعترافات ليلية- فكك مني
سلسلة دولة شقلوبستان – ومضات
هي دي مصر يا رأفت – البلد دي فيها حكومة
ليلي وبرقع الحياء – لماضة
الحاجة الى الرضا – راجي عفو الله
قناعات شخصية لا تلزم احد
حضنك حبيبي – بت خيخة واي كلام
الحتة الخضرا – اسف على الازعاج
زي النهاردة – عارفة ... مش عارف ليه
------------------------------------------------
القسم الخامس : أفضل ثلاث قوالب \ اشكال تنسيقية

المركز الاول : مدونة روح قلب ماما
المركز الثاني : قوس قزح
المركز الثالث : رحايا العمر و نبضات قلب ولهان و
Sweet violet و عالم مولان
المركز الرابع : تخاريف ايوشة
المركز الخامس
Appy Planet واحلى الاوقات

-------------------------------------------------
القسم السادس : أفضل ثلاث عناوين من عناوين المدونات

المركز الاول باغلبية كاسحة : الشعب لابد له من حكومة تشكمه
المركز الثاني : قوس قزح
المركزالثالث : البلد دي فيها حكومة و رغي امراة غير مطحونة و نط في الكوز و تحت الياسمينة
المركز الرابع : طعم البيوت و رحايا العمر و يا مراكبي
مفيش مركز خامس
------------------------------------------------------

القسم السابع : أفضل ثلاث اسماء تدوينية


المركز الاول : بت خيخة واي كلام
المركز الثاني : ستيتة حسب الله الحمش
المركز الثالث : فشكول و قوس قزح
المركز الرابع : ليس فقيرا من يحب و صبرني يارب و لماضة
المركز الخامس : بسكوتة
-----------------------------------------------

القسم الثامن : مدونات لا يفوتك المرور بها

المركز الاول : بت خيخة واي كلام
المركز الثاني : روح قلب ماما
المركزالثالث : مش عارفة بس نفسي اعرف.
المركزالرابع : الشعب لابد له من حكومة تشكمه – تخاريف مشكلة

-------------------------------------------------------
القسم التاسع : مدونات يجب ان تترك بها تعليق

المركز الاول : روح قلب ماما
المركز الثاني : مش عارفة بس نفسي اعرف
المركز الثالث : الشعب لابد له من حكومة تشكمه
المركز الرابع : بت خيخة واي كلام – تخاريف واحاسيس ايوشة – حنين القلب
---------------------------------------------------

القسم العاشر : أحداث تدوينية

المركز الاول : بؤجة الخير
المركز الثاني: التبرع الخيخي
المركز الثالث : الافطار الجماعي
---------------------------------------------------

سوري يا جماعة معلش مفيش تعليقات على البوست ده


لأن لو في تعليق أو كلمة استحسان … يبقى اللي يستحقها بسكوتة

الاثنين، 9 نوفمبر 2009

تواصُل مع وليد الزهيري

حوار أجرته معيّ مجلة "تواصُل" الصادرة عن مجلس الأمة الكويتي



كليك شمال على الصورة للقراءة



الثلاثاء، 20 أكتوبر 2009

اجتماع الكراسي الموسيقية


بداية أعتذر عن طول غيابي الفترة اللي فاتت بسبب الأجازة واللي حالت دون تواصلي في الفترة الأخيرة زي ما كنت سابقاً، وبالنسبة لموضوع حديثنا النهاردة يعتبر خبر بايت على رأي أخوانا الصحفيين نسبياً إنما مكنش ينفع متكلمش عنه وسبب تأخيري في نزوله على المدونة هو العيد كل سنة وأنتم طيبين ـ حتى دي كمان تعتبر متأخرة ـ ونهاية الأجازة وتحضير شنطة السفر مرة تانية… المهم ما علينا نرجع لموضوعنا

كان اجتماع المدونين الثاني خلال شهر رمضان في نادي القوات البحرية بالجزيرة وكنا جميعاً في ضيافة شريف الكردي والطريف أن النادي ده مجاور لمبنى قيادة الثورة واللي بيخضع لعملية ترميمات حالياً، ولما مريت بيه حسيت أني في مكان شهد لحظات فارقة في تاريخ مصر المحروسة… وربما حيث وضعت قدمي وطأ نفس المكان قدم محمد نجيب أو جمال عبدالناصر أو عبدالحكيم عامر أو أنور السادات

دخلت النادي وكان معايا أصغر مدون في الاجتماع وهو مهند سبايدر بوي، ومن الواضح أن مهند سرق الأضواء مني وانهالت عليه القبلات والهدايا كمان وأكتر حد تفاعل معه كانت فاتيما روح قلب ماما وكان هيطير من الفرحة بصفقة أدوات الرسم اللي قدمتها له هدية وأفتتح الأدوات دي بعمل اسكيتش هدية لها وطلبت منه بعد ما قدمه لها أنه يكتب على الاسكيتش أسمه والتاريخ ، وكان ممتن جداً لاهتمامها الشديد به، وكيكي كمان ظبطته بهدية كويسة وطول الطريق واحنا مروحين كان بيغيظ فيا، ويقولي أنا الوحيد اللي كان بيرسم علشان كده جت لي هدايا أدوات رسم، واللي يغيظ أكتر بقى إن لما عادل بحب السيما سأله أنت جاي مع بابا؟ أنتفض وامتلأت عروقه وقال بنبرة جريئة وواثقة من نفسها "لأ … أنا مدون" قاااال يعني الواد شخصية … وذو حيثيته كمان

نرجع لاجتماع المدونين في البداية كنا قاعدين حوالين ترابيزة على النيل مباشرة يعني ممكن تمد أيدك تلمس النيل وكل شوية الترابيزة دي تكبر وتكبر مع توافد المدونين تباعاً وكنا معشر الرجال على جانب الأيمن من الترابيزة بدايةً من مهند أول واحد جنب المية والعبد لله وعادل بحب السيما وشريف الكردي وبدأ يزيد الجنب ده بوصول أحمد القاضي يا مراكبي ونور الدين محمود ومصطفى ريان وخالد همس الأحباب، وعلى الجانب الآخر من الترابيزة حيث نون النسوة كانت داليا قوس قزح وفاتيما روح قلب ماما وميرا إمرأة بعقل رجل وكيكي فكك مني وصفاء عصفور في الأسر ودعاء مواجهات، بالإضافة إلى آخرين وأخريات لم يسعفني الحظ للتعرف عليهم

دي الأجواء العامة للاجتماع، وكان مفاجأة اليوم حضور أحمد القاضي وده لأنه يا دوووب لسه واصل من الصين وكان صعب جدااااا حضوره في نفس اليوم وكان الله في عونه لضيق وقته وحضر بناء على رغبة قوس قزح الملحة لتفاجأ به الجميع عامة وتفاجئني بحضوره خاصة وبصراحة يعني دي كانت رغبتي في إني أقابله لأن أجازتي كانت على وشك نهايتها

وكان حديثي مع القاضي ممتع للغاية وكان يجلس على يساري قليلاً وكنت أتأمله بين الحين والآخر وأراه أكثر وسامة من الصورة الموجودة في البروفايل بتاعه، واتضح من حوارنا إنه كان موجود لفترة في الكويت وكان مقيم في منطقة قريبة مني و إن شاء الله احتمال يزور الكويت قريب بعد العيد واتفقنا على وعد بلقاء آخر في الكويت بإذن الله مع بعض المدونين المصرين المقيمين هنا في الكويت، وأخجلني كثيراً ثناءه على قصة غزل البنات، وأبديت له أسفي علشان مجبتش معايا مجموعته القصصية (الحياة بدون كاتشب) علشان يكتب لي عليها إهداء

وصل نورالدين محمود بعد شوية ودخلنا في مقارنة سياسية صغير كده على جنب بين الديمقراطية في الكويت والديمقراطية في مصر، وكانت الكفة أرجح لديمقراطية الكويت … وطبعاً لابد أن أعتذر لنور لعدم تواصلي وياه بعد لقاءنا ده والسبب إنه نزل موضوع عن نفس الاجتماع تحت عنوان "على ضفاف النيل" وحتى لا أتأثر بما كتبه وأنا أنقل الحدث من وجه نظري،خوفاً من براعة قلم نور وتمكنه من أدواته، وتجنبت زيارة مدونته الفترة اللي فاتت دي علشان أحفظ له حقه الأدبي فيما كتبه، وخوفاً على نفسي من الإحباط بعد ما أقرا اللي كتبه نور وبالتالي أتقاعس أكتر ما أنا متقاعس… وأرجو إن نور يتقبل عذري في تقصيري المبالغ فيه طول الفترة اللي فاتت


نرجع لمرجوعنا ألا وهو اجتماع المدونين، إذ فجأتاًاًاًاًاًاً ندهت عليا ميرا لفض الاشتباك بينها وبين مصطفى ريان ـ وكان جنبهم داليا قوس قزح بعد ما غيرت مكانها هي وصفاء عصفور في الأسرـ وكان حوار ميرا ومصطفى أكثر من ممتع وظريف للغاية لإنكار مصطفى لموهبتها وتأكيدها على تلك الموهبة وأدليت بدلوي في المناقشة الحامية دي مؤكداً موهبة ميرا ومستشهداً بقصة "عم حميد" اللي كتبتها في بداياتها التدوينية واللي مازالت عالقة بكل تفاصيلها بذهني، وبصراحة يعني كنت ببص لهزار ميرا ومصطفى وأنا في غاية الامتنان لأني كنت سبب بعد الله سبحانه وتعالى في تعارفهما ببعض وبحمد لله الشهر ده نزل لميرا قصة على مجلة ميكانو وإن شاء الله ربنا يوفقها للخير دايماً ومصطفى كمان الأديب الشاب صاحب القلم الرشيق

ودار حديث جانبي في كلمة ونص بيني وبين داليا عن موهبة الحاضرين زي كيكي وتميز موضوعها الخاص بتجمع المدونين في مستشفى أبوالريش بالإضافة لموهبة دعاء مواجهات ومصطفى ريان وميرا والقاضي وكثيرين من المتوقع إنهم يكونوا نجوم جامدة قريب أوووي إن شاء الله


رجعت تاني لمكاني جنب مهند سبايدربوي بس كان جنبه وقتها دعاء مواجهات وكيكي عوووو واتكلمنا شوية عن قصيدة دعاء اللي فازت بجايزة ونشرت مؤخراً في مجلة، ولم يتسع الوقت للمرة التانية وقد يكون تقصيراً مني للحديث مع كيكي عووو والتي تستحق كل تقدير لموهبتها الواااضحة وأفتكر إن عندها وقت دلوقت بعد ما اتخرجت لو تكتب مسلسل كوميدي في حلقات منفصلة زي راجل وست ستات مثلاً أو حتى متصلة مش هتفرق لأن كيكي موهوبة فعلاً وخيالها خصب جداً وإن شاء الله لو درست الفكرة كويس ممكن نشوف مسلسل من تأليفها في رمضان بإذن الله، وده الكلام اللي كان نفسي أقوله لها ومسمحتش الظروف إني أقوله

وبعد شوية من الززززن اللي كان على الترابيزة ، كان لازم نمشي علشان الوقت جري بسرعة من غير ما ناخد بالنا … ورفعت راسي لفوق شوية …وألقيت نظرة عامة على كل الموجودين، وكان مفيش حد فينا قاعد على نفس الكرسي اللي قعد عليه أول ما وصل. وكأننا كنا بنلعب …لعبة الكراسي الموسيقية


أعتذر مجدداً عن التأخير لظروف السفر وأسباب أخرى … وإن شاء الله نتقابل زي زمان كل يوم تلات على الشاشة دي

الاثنين، 7 سبتمبر 2009

نجوم فوق العادة


الحمد لله رب العالمين، ربنا قدر لي مشاركة المدونين في يوم الإفطار الجماعي بمستشفى أبو الريش الياباني للأطفال بحي السيدة زينب وبصراحة اليوم كان أكتر من رائع وصلت هناك على الساعة 2 الضهر تقريباً وداليا قوس قزح كانت أول حد من المدونين أشوفه وكان من الموجودين فاتيما روح قلب ماما ورحاب آبي بتنجاني وسوما مجنونة في بلد عاقل وفاتيما فعلا لم تختلف عن شخصيتها في مدونتها إنسانة ودوده جدا وكان أول حد حصل تفاعل بيني وبينها لما قدمت لها كتاب أنا أنثى اللي كانت شاركت فيه علشان تكتب لي عليه إهداء وكانت ساعدتها بالغة لما عرفت إني عملت كده علشان توقع لي على النسخة دي، والحقيقة الفضل في ده يرجع لداليا قوس قزح لأنها هي اللي دلتني على المكتبة اللي ممكن ألاقي فيه الكتاب علشان فاتيما تكتب لي عليه إهداء وبالتالي الفضل في الابتسامة اللي أترسمت على وش فاتيما يرجع لداليا

بعد كده كان حضور الأستاذ شرين الكردي صاحب مدونة لست إلا بعض أوراق حضور مميز وطاغي لشخصية تثري أي مكان تتواجد فيه بالزخم وارتقاء لغة الحوار ولفت نظري في بداية مشاركتي الحوارية معه عندما علمت أنه ممن شاركوا في حرب أكتوبر 73 شعرت أني في حضرة بطل ممن حملوا أرواحهم على أكفهم من أجل كرامتنا هذا بالإضافة إلى ثراءه الثقافي ودعوته المميزة التي قدمها لي كي أكون في معيته لحضور إحدى ندوات علاء الأسواني والتي تعقد كل خميس، وانقطع حديثي معه عندما انتقلت إلى حجرة الوجبات في الأوضة المجاورة لنا

وكانت دي لحظة مميزة أخرى وبدأنا حصر الأعداد في أقسام المستشفى وتجهيز الأعداد المناسبة من الوجبات لكل قسم، وفي الأثناء دي أتعرفت على مينا جرجس صاحب مدونة مش أسف على الإزعاج اللي جاي علشان يشارك في الإفطار الجماعي في شهر رمضان ، وكان من الناس اللي حرصت على إني أخد رقم موبايله علشان أتواصل معاه بالإضافة إلى تعرفي على كيارا صاحبة مدونة عالم مولان

بعد كده كان وصول مصطفى ريان صاحب مدونة إبداعات شاب ثائر وهو أحد أهم الشخصيات اللي حضرت علشان أشوفها كان جايب لي نسخة من مجموعته القصصية الأولى اعترافات رئيس سابق وكانت المفاجأة له إني جبت نسخة من مجموعته معايا علشان يكتب عليها إهداء أفتخر بيه زي ما قولت له قبل كده إن هيجي يوم وأنا بفرج أولادي على إهدائه لي وأقول لهم الكاتب الكبير ده صاحبي

أتقسمنا لمجموعات وكل مجموعة مسئولة عن دور في المستشفي لتوزيع الوجبات والتبرعات عليه، وكنت مع مجموعة مكونة من سبعة أفراد ترأست الفريق ساجي لخبرتها ومشاركتها في نفس اليوم السنة اللي فاتت وساجي مش من المدونين إنما من الفيسبوكيين وشخصية ذات حضور طاغي بالإضافة للمدون أحمد سكر وكان معانا كمان صاحبة مدونة هلفطة وتلت صديقات لها من طب بيطري ، والدور المنوطين بيه هو التوزيع على الدور التالت واللي يشمل قسم الجراحة وقسم المخ والأعصاب، وشاركنا في التوزيع شخصية لذيذة جدا أسمها عم محمود من إدارة المستشفى ربنا يبارك له ويديه الصحة، وأغرب حالة شوفناها كانت لطفلين توأم متلاصقين في النصف السفلي بداية من البطن أحدهم هايبر أكتف والآخر هادئ ووديع للغاية ربنا يحفظهم ويخليهم لأمهم اللي كانت قاعدة قدامهم صعبان عليها حال ضناها… ومفيش داعي الواحد يتكلم عن الحالات التانية اللي شوفناها لأن أكيد اللي لم يسعده الحظ في المشاركة مقدر حجم الألم اللي بيتحمله الأطفال دوول والمعاناة المرسومة على ملامح الأمهات أكبر بكتيرررررر من أي كلمة ممكن تحاول توصف آلمهم

بعد كده روحنا لتسيباس علشان الفطار وبدأ وصول المدونين تباعاً ومع أذان المغرب وقفت خيخة وطلبت من الجميع بالدعاء قبل الإفطار بأربع دعوات أولهم عودة يوسف لأمه فاتيما والرحمة لمدونة توفيت عمرها 18 سنة والثالثة الدعاء بالشفاء لوالد مدونة شارك معانا في التبرعات والتي ساهمت في إنجاح اليوم وأخيراً لمدونة مغربية في كربة

بعد الفطار بدأ المدونين بالتعرف على بعضهم البعض وكانت أجمل اللحظات عندما يعلن وجه غير معروف عن أسم مدونته وتجد القبلات والأحضان الحارة وكأنه عزيز لديك لم تراه من منذ زمن وهذا ما حدث مع صديلانية طالعة نازلة عندما أعلنت عن شخصيتها أنقضت فاتيما أم يوسف عليها بشوق وود يفوق الوصف، وتعرفت على زوجها وكان شخصية مهذبة للغاية وسعدت بالتعرف عليه، لأنه كان بجواري وقت الإفطار

وكان لقائي بنور الدين محمود متأجج في مشاعره الصادقة والرغبة الحثيثة في تعرف كل منا على الآخر وكانت الرغبة صادقة في ذلك حتى قبل أن نرى بعضنا البعض وأفصح عن سؤال يراوده دائماً ـ ليه مدونتك اسمها عارفة مش عارف ليه!!! أيه حكاية مش عارف ليه دي ؟ أبديت استغرابي أنا كمان ورفعت كتافي وقولت له ، مش عارف لية … واتفقنا على لقاء تاني إن شاء الله قبل سفري للكويت

كانت ميرا امرأة بعقل رجل مرحة بطبعها وكنت سعيد جدا بتعرفي عليها وجهاً لوجه وكانت همزة الوصل في تعرفي على صاحبة الشعبية الطاغية كيكي عوووووو صاحبة مدونة فكك مني وكانت زي نجوم السينما وأول ما تشوفه تفتكر أسمه في أشهر أدواره وتنادي عليه بيه زي صلاح السعدني مثلا لما تقوله حسن أرابيسك نفس الشيء حصل مع كيكي لما كان كل واحد يشوفها يفتكر لها بوستها الشهير "حبيبي يا أبو أشرف" والخاص بالحديث الحصري لجوزيه مع مدونتها قبل رحيله عن النادي الأهلي، وعرفتني ميرا كمان على عادل صاحب مدونة بحب السيما لتشابهي معه في الاهتمام بالسينما وهو شخصية لديها الرغبة والطموح في أن يكون حاجة مهمة في السكة دي وإن شاء الله ربنا يوفقه، وجاءت آنسة مهذبة وبريئة وقالت : أستاذ وليد عارفة مش عارف ليه، قولت لها أيوة قالت لي أنا دعاء مواجهات وكانت لحظة السعادة بالتعرف عليها والذهول لاختلاف الخيال عن الواقع فلقد رسمت لها صورة في خيالي ولك أن تتخيل كلمة مواجهات لتترك انطباعاً مثيراً في خيالك وكان اللقب ده على أنسه كوول للغاية، واتكلمنا عن الموضوعات اللي كتبتها واللي دايما تحمل قدر عالي من العمق

رافقني مصطفى ريان حتى اللحظة الأخيرة وقبل أن يودعني قال لي كلمة بقيت عالقة في ذهني … قصصك يا وليد شبهك

وقبل الختام يجب الإشارة إلى من هم النجوم فوق العادة

الدينامو
كان خالد همس الأحباب هو الدينامو ودوره التنظيمي واضح بشكل مميز و فطر بعد أذان العشاء لاهتمامه بتوصيل الفطار لكل مدون وهو شخص قادر على إذابة جليد اللحظة الأولى عندما يهل عليك وابتسامته تسبقه وهو يقول لك : خالد همس الأحباب وهو يمد يده للترحيب بك، وبالرغم من إن الظروف مسمحتش قبل كده إنه يزور مدونتي إلا إنه قال إنه سمع عليها من مدونة المهندس الحاضر الغائب لوجوده في السعودية وكان محور حديثنا ورشحت له موضوع المهندس اللي تناول فيه تاريخ الحياة الحزبية في مصر لحياديته وثراء الموضوع كدراسة بحثية لهذه النقطة المثيرة للجدل دائماً، ولا أنسى لخالد اتصاله التليفوني بعدما ودعنا بعضنا جميعاً ليطمئن على وصولي إلى بيتي سالماً، شكراً جزيلاً له فهو نعم الأخ والصديق

رُمانة الميزان
من الممكن إذا لم يحضر واحد أو أثنين أو حتى عشرة لا تشعر بغيابهم أو حتى إذا حضروا لا تشعر بتأثيرهم في سير الأحداث ولكن بالنسبة لشخصية بحجم داليا قوس قزح قد لا يكلل يوم كهذا بالنجاح إذا غابت عنه لأنها ببساطة تحمل سمات رُمانة الميزان وقدرتها على الربط بين جميع الأطراف بعضها البعض وساعدها على ذلك شخصيتها الديناميكية والمتوهجة دائماَ والتي تشع خيراً ورغبتها الصادقة في إنجاح اليوم ولم تهدأ على الإطلاق سواء من بداية اليوم في استقبال المدونين واستلام الوجبات ودورها التنسيقي كهمزة وصل بين المدونين من جانب وإدارة المستشفى من جانب آخر، ودورها في تعريفي ببعض المدونين على اعتبار أنني شخصية مجهولة للسواد الأعظم منهم، وإصرارها على حضور أحمد كمال صاحب مدونة رحايا العمر وعرفتني عليه والذي كثيراً ما تمنيت لقاءه وكذلك عرفتني على مصطفى ريان، داليا شخصية تعمل في صمت ولديها رصيد هائل من إنكار الذات والتفاني في إسعاد الآخرين فهي بالفعل بين المدونين رُمانة الميزان… جزاها الله عنا خيراً

الصورة نقلاً عن مدونة داليا قوس قزح

الأربعاء، 26 أغسطس 2009

فطارك عندنا …وأسأل مجرب من رمضان اللي فات


كل عام وأنتم بخير رمضان كريم علينا جميعاً يا رب، وده تاني رمضان أحضره بين المدونين والسنة اللي فاتت قضيته في الكويت وأكتفيت بالمشاركة بالتهنئة من بعيد لبعيد يا دوب زيارات لمدونات صديقة وكلمتين وخلاص نقول بيهم كل سنة واحنا طيبين لبعض ، وطبعاً كنت بطيب خاطري بالكلمتين دوول وأقول لنفسي أهو أنت متواصل مع الناس والحمد لله، إنما من جوايا بصراحة كان نفسي اكون موجود في مصر علشان اشارك معاكم في الأنشطة اللي قومتم بيها واللي كنت بتابع ردود أفعالها على مدار الشهر.

ورمضان السنة دي مختلف بالنسبة لي لأني الحمد لله بكتب البوست ده وأنا في مصر أم الدنيا وبجد فعلا هي أم الدنيا يا جماعة وحسيت ده أوووي أول ما أتفتح باب الطيارة وشميت أول نسمة هوا باردة … مليت بها صدري وكنت عايز احبسها مخرجهاش تاني من شوقي لها.

وبناء على ما سبق من حرمان عيشته وحسيته في الفقرة الأولانية، وزوال سبب الحرمان في الفقرة التانية، إن شاء الله الشرف ليا إني أكون بين المدونين يوم 5 سبتمبر في مستشفى أبو الريش، وتفاصيل يوم الإفطار الجماعي ده نقلاً عن مدونات … داليا قوس قزح ـ خالد همس الأحباب ـ آبي بتنجاني



كل عام و انتم بخير

و رمضان كريم

و يارب يتقبل صيامنا و صلاتنا و قيامنا فيه

السنة اللى فاتت ربنا وفقنا و عملنا يوم جميل التقينا فيه على الخير و اسعدنا اطفال كتير معنا فى مستشفى ابو الريش

و يمكن يومها شوفنا ان اغلب الاطفال سنهم صغير و بيحتاج وجود مرافق معهم وغالبا بيكون المرافق ده ام الطفل او باباه .. الناس دى لاحظنا انهم وقت الفطاربيدور على اى حاجة بسيطة تنفع يفطروا بها لدرجة ان فى امهات فرحت بشويةالبسكويت اللى وزعناهم للاطفال علشان تخليها للفطار

طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مشعارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة


و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا

الوجبة هتكون عبارة عن : رز + خضار + قطعة فراخ او لحمة + مخللعيش + ثمرة فاكهة

و هيكون تكلفيتها 10 جنيهو المعاد هيكون يوم 5 سبتمبر

الساعة 3 قدام باب مستشفى ابو الريش اليابانى للاطفال

نفس المستشفى اللى اتجمعنا فيها قبل كده


و لو ربنا اكرمنا و كان عدد الوجبات يفرح و عددها كتير ممكن نفطر التمرجيةبتوع المستشفى او نطلع على المستشفى اللى جنبها و هى مستشفى المنيرة لاطفال ونوزع على المرافقين هناك

و اليوم ده مش بس للناس ده كمان لنا احنا لان الرسول الكريم قال " مَن فطَّرصائماً كان له مثل أجره غير أنه لا ينقص من أجر الصائم شيء "يعنى ان شاء الله ناخد اجر صيام كل شخص قدمنا له وجبة

و فى حاجة عايزة اقولها للناس اللى مش هتقدر تشارك فى التبرع انهم ممكنيحضروا معنا و يشاركوا فى توزيع الوجبات و التخفيف عن الاطفال و اكيد دهبردو له اجر عند الله

و طبعا لاننا مش هنلحق نرجع بيوتنا على وقت الفطار ممكن بعدها نروح نفطر معبعض فى نفس المكان اللى روحناه المرة اللى فاتت - جزا الله سوو خيرا هو اللى راحصور المكان و جاب قائمة الاسعار منه - محل ابو خالد فى شارع شمبيليون وده بيقدم مشويات و رز و سلطات و سعر الفطار عنده ممكن يكون فى حدود ال 30 جنيه

و لو حد عنده اقتراح بمكان تانى للفطار ياريت يقول لو المكان ده مش مناسب
وممكن لو تحبوا نعمل حسابنا اننا نفطر من نفس الوجبات اللى هنقدمها للناس معهم

اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه

المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت

ده ايميلات الناس المسئولة عن اليوم

kouskoza7@hotmail.com

butterfly_549@hotmail.com

kh_cyc2006@hotmail.com


و ده ارقام ممكن تبعتوا رسالة عليها او تسالوا على اى شىء خاص باليوم ده

داليا صاحبة مدونة قوس قزح

0117742287

استاذ خالد صاحب مدونة همس الاحباب

0101345140




الاثنين، 11 مايو 2009

يا نور جديد


يا نور جديد في يوم سعيد
ده عيد ميلادك أحلى عيد

يوم ما إتولدتي البدر قال يا حسنها
اغيب أنا و هي تنور مطرحي
والشمس مالت مالخجل في برجها
غنت يا دنيا بنورها غني و أفرحي
الطير صدح سبح بقدرة ربنا
ومن الفرح غنى وقال يا سعدنا
الورد فتح في عيد ميلادك
عالحسن صبح في عيد ميلادك

فين سحر بابل !! جنب سحرك يا عيون
وفين سهام الحب !! جنبك يا جفون
ياللي بقوامك إنتي أخجلتي الغصون
لو تطلبي روحي فدى … روحي تهون
قولي إنت ايه؟
أنا عبد خاضع للجمال
و جاي ليه؟
جيت لما قلبي إليكي مال
أطلب رضاكي في عيد ميلادك
وأقطف بهاكي في عيد ميلادك

يا نور جديد في يوم سعيد
ده عيد ميلادك أحلى عيد :)

أحتفل اليوم بميلاد مدونتي الجديدة "Cine Tulip" وتدشينها ـ حلوة تدشينها دي ـ المهم، جاء في تعليق soly88 على بوست فيلم "عمارة يعقوبيان" اقتراح بإنشاء مدونة خاصة بالسينما وفي ذلك الوقت ترددت في تنفيذ الفكرة لما يحتاجه هذا الأمر من جهد ، وبقيت الفكرة تراودني بين الحين والأخر، وبعد ما تم نشر لي عدة مواضيع في النقد السينمائي والحمد لله وازدياد نشاطي في هذا الجانب ، عادت فكرة إنشاء مدونة خاصة بالسينما تلح علي مجدداً لعرض الموضوعات المنشورة على مدونة تختص بتلك النوعية .

وبحمد لله وتوفيقه أنشأت مدونة متخصصة في السينما واسمها فرض علي جهود كبيرة في البحث عن الـ Template المناسب لها مثل المدونين جميعاً عندما يكون أحدنا بصدد إنشاء مدونة جديدة إلى إن وفقت إلى اختيار Template مناسب لها ، وتلك كانت لحظات المخاض للمدونة السينمائية "Cine Tulip" وأتمنى أن تحوز على إعجابكم مثلما نالت "عارفة … مش عارف ليه !!!" وأن يكون محتواها السينمائي مفيد وذا قيمة لنا جميعا، فالتدوين عمل إيجابي بين المدونين جميعاً وهي علاقة أشبه بعلاقة الممثل المسرحي بجمهوره قائمة على الفعل ورد الفعل هكذا التدوين.

يقوم المدون بنشر موضوعه ويأتي بعد ذلك دور المتلقين من خلال ردود أفعالهم بين الإيجاب والسلب والمهم في ذلك هو إيجابية العلاقة وهذه التعليقات تثري الموضوع وتضيف له ولهذا فكلنا شركاء في أي مدونة وبمجرد نشر أي موضوع فيها لم يعد ملك لكاتبه وأنه فقط شريك فيه مع قراءه ومن علق عليه وترك جزء من جهده للمساهمة في نجاح الموضوع والمدونة ككل لذا فنحن جميعاً ملاك كل المدونات التي نعرفها … حتى وإن كان بشكل ضمني.

لماذا Cine Tulip ؟

هناك قاسم مشترك بين زهرة التيوليب والسينما … أنه الخيال، فالسينما تأخذك إلى عالم خارج حدود أرض الواقع محلقة بك وتمنحك أجنحة تذهب بها بعيداً إلى عوالم مالم تكن تدركها دونها، وقد نجح علماء اللغة العربية عندما أطلقوا عليها "دار الخيالة" فإن السينما هي ما يحمله هذا المصطلح من معنى.

التيوليب … ليست مجرد زهرة فعندما تغمض عينيك وتتلمس أوراقها جفونك المغمضة تشعر وكأنك مثلما قال صلاح جاهين "تلقى حتى الضلمة بمبي" وبالرغم تأثيرها الطاغي إلا أنها أضعف ما يكون تحتاج لعنايتك القصوى لرقتها وعذوبتها و الرفق بها كلما دنوت منها، إنها زهرة التيوليب ذلك العالم المخملي الذي يأسرك دون أن تحتاج إلى شاشة بيضاء تشاهد عليها خيالك.

هكذا رأيت العلاقة بين التيوليب والسينما، فالأخيرة تحتاج لأدوات كي تأخذك إلى عالمها … أما التيوليب لا تحتاج إلى كل ذلك لأنها … الخيال في حد ذاته.

الثلاثاء، 21 أبريل 2009

شهداء بلاط الملكة




على الهامش:

ختاماً لاحتفالات المدونة بعامها الأول كان لابد من الإشارة إلى أول قصة قصيرة في عمر المدونة والتي لم تحظى بأي أضواء وقت نشرهاً لعدم وجود زوار للمدونة في تلك الفترة، اليوم أعيد نشرها مرة أخرى ربما تنال قدراً من القراءة لم تنله في إصدارها الأول.

ـ هل قرأت هذا الإعلان؟
ـ لا … أين هو؟
ـ هناك … تعلقه إحدى النحلات الشغالات في مملكتنا تعالى لنقرأه.

إعلان هام

على ذكور الخلية الاستعداد لمراسم الزواج الملكي، ستبدأ مراسمه في الساعة الثانية تماماً من بعد ظهر الغد بين الذكور من أجل الفوز بقلب ملكتنا الجميلة حيث تشير الأرصاد الجوية للمملكة بأن الغد سيكون صحواً سماءه صافية شمسه مشرقة والهواء سرعته ملائمة … أنه يوم يليق بهذه المناسبة الملكية بحق.

ـ إذاً سيكون الغد يومنا.
ـ هل أنت سعيد بهذه المناسبة.
ـ ولم لا.
ـ بقدر ما سيكون الغد يوماً سعيداً لعذراء المملكة، بقدر ما هو مذبحة لذكورها.
ـ ستشترك غداً بهذه المناسبة؟
ـ أنا !!! لا … لست راغباً فيها إن قلبي معلق بوصيفتها.
ـ لكن وصيفتها نحلة غير مكتملة الأنوثة مثلها مثل باقي الشغالات، عاقرات خلقن للعمل ليس إلا ، فقط ملكتنا هي أنثانا الوحيدة.
ـ ولم لا تقول أن وصيفتها خلقت للعطاء المطلق بلا مقابل لقد قدمت لي الكثير وكانت الأقرب إلى دون أي نحلة أخرى كانت تطعمني من عسلها … هل يكون هذا جزائها؟ ثم أن ما يبهرني في الملكة ليس جمالها ولكن عقلها وقدرتها على إدارة شئون المملكة هو أكثر ما يثير اهتمامي، ربما أأتي مشاركاً لأقدم إليها عرضاً لم تحن لي فرصة مناسبة من قبل في أن أعرضه عليها.
ـ وما هذا العرض؟
ـ ستعرفه أن تحقق، وهل ستشترك أنت؟
ـ سترى ماذا سأفعل غداً.
ـ أشفق عليك، فأنت صديقي الوحيد وأخشى أن أفقدك بعد زواجك منها، ألا تعرف انك بمجرد تزاوجكما تفقد حياتك كنتيجة طبيعية للتزاوج؟
ـ لا يهم يكفيني أن أنال منها … ليكن ما يكون بعد ذلك، يا صديقي … أنها سعادة لا أتمناها لك.

صدقت الأرصاد في هذا اليوم، كل شيء مهيأ ليوم أسطوري، تتابع الوصيفات كل الترتيبات المسبقة لقدوم الملكة في موكبها، حيث ترى الوصيفة من شغف قلبها حباً بين الجموع فتتوارى حتى لا يراها وآثرت أن تجنبه نظرات الخجل مشفقة عليه من مصيره المحتوم وأيقنت أنه لن يعود من رحلته هذه كما كان … إن عاد.

تطل الملكة العذراء من مقصورتها الملكية في أبهى صورها محدثة صوتاً ألهبت به حماس ذكورها مهمهمين فيما بينهم عن أنوثتها المتأججة … خطواتها الواثقة … عطرها الملكي الجذاب ، تتقدم الجميع في مشهد مهيب إلى الوادي الجبلي المحيط ببلاطها الملكي، وتبدأ مراسم الطيران الكلاسيكي لزفافها يتبعها جيش جرار من الذكور المتعطشين للحاق بملكتهم الهيفاء، التي تسبقهم جميعاً لتشكل سهماً هي رأس حربته يشق بتعرجه الشديد الوادي المزهر.

يبدأ مسلسل السقوط مبكراً للذكور الأضعف واحداً تلو الآخر ليكون مصيرهم الموت المبكر دون أن ينالوا مبتغاهم، ويتقلص العدد كثيراً ولم يتبقى منهم إلا الأشداء، وما يزيد من تحملهم للمشاق هو رغبة جامحة أكثر جلاده من قوتهم الجسمانية، وكلما أوشك أحدهم على اللحاق بها زادت من انطلاقها بأقصى سرعة مرتفعة لأعلى مسافة يمكنها بلوغها في السماء.

تقدم حبيب الوصيفة بثبات دون اكتراث بالآخرين وربما كان السبب في تقدمه عليهم هو عدم رغبته في الفوز بها واقترب كثيراً من صاحبه الجلالة فزادت من سرعتها وارتفاعها، تقدم أكثر وأكثر حتى دنا منها قائلاً:

ـ انتظري لست أسعى مثلهم إليك فإن لدي حياتي ومن أحيا من أجلها وهذا ليس هدفي بل إن ما أردته من مشاركتي هذه هو عرض أريد تقديمه لم تحن لي فرصة من قبل في أن أعرضه عليك حيث لي رغبة في ترشيحي لمنصب مستشاراً لشئون ذكور المملكة، فنحن نعاني من عدم الاهتمام ونباد دون أي مبالاة لحقوقنا ، أريد أن أنظم هذه العلاقة وأقدم لك بعض المشاورات لنستفيد منها كذكور وتمنحنا حياة كريمة.

توقفت للحظات وهي تحلق في مكانها مستغربة حتى تستوعب ما تسمعه … من هذا الذي خرج على عرف الخلية؟ ثم أسرعت في طيرانها للحاق به بعد ما استمر في حديثه دون الالتفات لتوقفها، ابتسمت إعجاباً بإيمائه تعني أنها قبلته مستشاراً لها، وستكون أول مهامه المساهمة في اختيار الأوفر حظاً لنيل الشرف الملكي، بالفعل استشارته في بعض ممن اقترب منها رغبةً في الزواج، وكلما اقترب منها احدهم مزهواً بنفسه وبنظراتها الواثقة تتفحصه وتستشيره في شأنهم … فيرد قائلاً:

ـ كثيرون هم ضحاياك يا مولاتي.

بنظرة يملؤها الأسى والحزن قالت:

ـ هذا قدري الذي لم أختره لم أكن أحب هذا الدور، ما تمنيت أبداً أن أحطم قلوبهم وما خلقت نفسي هكذا، سئمت كل شيء من حولي، حتى أنت أخاف منك وعليك من يوم وتفكر فيه مثلهم.

جذبها بحواره ليخرجها من إحباطها مدعياً:

ـ لست مثلهم كما أنني غير عابئ بالأمر برمته.

قص عليها قصته منذ نعومة أظفاره حتى اللحظة التي يحلق فيها بجوارها ، قصت له قصتها ودار حوار بينهما أنساهما مشقة الرحلة، أثناء حوراهما لاحظ كل منهما التوافق المثير للدهشة الذي يجمعهما … مما أشعل في رأسه فكرة الذكورة قائلاً بين نفسه … لم لا؟ ألست ذكراً مثلهم ؟ وأكثرهم جدارةً بها؟ إنها أنثى بما تحمله الكلمة من معنى.

في تطور لافت أغمضا عيناهما لثوان … وبدا شيءً ما يلامس قلبيهما وأختلف نظراتهما من النظرات المعجبة إلى النظرات الدافئة …غنيا سوياً أغانيهما رقصا بأجنحتهما على دقات قلبيهما، ودون تصريح معلن تمنته لنفسها وتمناها لنفسه، لم تعد تلتفت لمن خلفها من ذكور الخلية، دار بينهم ما لم يدر بخلدهما حتى ولم يدغدغ أحلامهما من قبل.

دار بينهما حوار صامت لم يُرْتُُقِ للهمس …

ـ زوجيني نفسك.
ـ زوجتك نفسي.
ـ وأنا قبلت زواجك.
ـ سعيدة معي.
ـ ما تمنيت حباً كهذا.
ـ سيكون حباً خالداً وستسعد به المملكة كلها.
ـ كلها … ولكن.
ـ نعم … ولكن.
ـ لكن ما ذنبها أنها ستكون ضحيتنا؟
ـ أجل سنحطم البعض في طريقنا.
ـ هل أتقمص دور الملكة بما لي من سطوه وصولجان؟
ـ لا أنت … ولا أنا هكذا.

بين هذا وذاك ترفعا عن مشاعرهما مكتفيين بنهر العسل الذي شربا منه حتى لا يكون هناك ضحايا لا ذنب لهم ، تغلب صوت العقل على صوت القلب.

أومأت بعينيها … ثم نظرت للوراء لترى من هو أقرب الذكور إليها ؟ لم يعد مهم من يكون، فقط لابد أن تتم مراسم التزاوج ليس لرغبتها في ذكر بعينه كلهم أصبحوا سواءً بالنسبة لها … التقت أعينهما في لحظة يائسة قائلاً:

ـ أتعرفين … لم يعد هناك للموت رهبة، ربما تكون فيه الراحة التي تشفي من كل هذا العذاب، لقد انتشيت معك بفن حب الحياة … وبدونك عشقت فن حب الموت.

بدون تردد ونبرة حاسمة ، قالت مدافعة عن قرارها بإنهاء طريقهما معاً مفضلة له الحياة عن الموت بزواجه منها :

ـ ألا تعرف … سأقتلك دون أن أشعر؟
ـ هل هذه حياة بدونك؟ أريد أن أفني حياتي في حياتك.
ـ لم يكن قصدي أبدأ أن أؤذيك.
ـ أعلم هذا، إن ما حدث لم نكن نقصده.
ـ كل ما فعلته أنى أحببتك.
ـ إلى أين أنت ذاهبة؟
ـ سامحني.

كانت هذه كلمتها الأخيرة التي سمعها منها منطلقة دون الالتفات خلفها ، تخشب في مكانه من صدمته في حبه الذي لا أمل له … دون الانتباه لطنين صديقة المتأجج برغباته قادماً من الخلف لا يرى أمامه سوى هدفه المنشود ساحقاً بأرجله من في طريقه عن غير عمد ليفقد الحبيب المصدوم جناحه الأيسر مطلقاً صرخة مدوية تملأ الوادي ألماً لفقدان ملكته أكثر من فقدان جناحه.

تلتف على أثرها الملكة العذراء لترى حبيبها يتهاوى كورقة شجرة في الخريف في دوامة هواء، و يتمكن منها الصديق المحموم برغبته ممسكاً بها بأرجله الستة، محاولة الإفلات دون جدوى، ويكون مشهد تزاوجهما أخر ما تراه أعين الحبيب… يدير نظره عنها إلى الأرض يحتضنها مبتسماً إلى وجه الموت.

وقد أمسى مجرد رقم … في طابور شهداء بلاط الملكة.

الثلاثاء، 14 أبريل 2009

وليد الزهيري … كلاكيت أول مرة

مرور عام تدويني شيء يستحق الاحتفال، بهذه المناسبة يجب أن أتوجه بالشكر والعرفان بالجميل والتحية إلى من دفعني إلى التدوين وأخذ بيدي لأن أكون هنا اليوم بينكم، وبحمد الله اعتقد أني أنجزت الكثير خلال هذا العام كتقييم لهذه المرحلة، ومن خلال تعليقاتكم شعرت أن ما يميز المدونة هو القصة القصيرة والسينما.

وقد كان للقصة القصيرة دوراً هاماً في حياتي اهتديت إليها كوسيلة للتعبير عما يجول بخاطري بفضل بعض المحيطين وغير المحيطين … وكان لمن تتلمذت على يديه الفضل الكثير بالرغم من أني لم أره عن قرب حتى اللحظة وأدعي أنه "عرَابي " الذي أهتدي على هديه وإن كنت أراه مثل من بنى الهرم الأكبر حينما أمر بجواره أدعي أن من بناه هو جدي ـ تماحيك مش أكتر ـ هكذا علاقتي بالعلم "إبراهيم أصلان" فتحيه له أينما كان.

تشغل السينما كذلك حيز لا بأس به من اهتماماتي ومن تعلمت فن تذوق السينما على يديه كان الأستاذ كما يطلق عليه "يوسف شاهين" أدركت معه كيفية تكوين الصورة وحركة الممثل كما تعلمت من خلال مدير تصوير أفلامه رحمة الله عليه "عبدالعزيز فهمي" لغة الضوء وكيف يمكن أن يرسم به … وما تأثير ذلك على المتلقي، هناك كثيرون ممن نهلت من نبعهم في شتى مناحي الحياة لا يتسع المقام لذكرهم جميعا أدين لهم بالولاء ، وهم جميعاً من أسهم في أن أكون بينكم الآن … فلولاهم ما كنت.

وبدايةً من هذه القاعدة وصولاً لدعم المدونين الذي منحني الكثير بفضل الله ثم فضلكم الذي لمسته في تعليقاتكم تم نشر أول موضوع لي خارج نطاق التدوين و ذلك عن طريق صحيفة "الوسط" اليومية الكويتية التي قامت بنشر أول نقد سينمائي خاص بي تناولت من خلاله فيلم "فروست/ نيكسون" Frost/ Nixon وكان ذلك بمثابة تتويج للمدونة في عامها الأول فهي كانت بوابتي التي خرجت منها إلى النور، وما أسعدني ليس نشر المادة فحسب بل مساحة الموضوع ومكانه في الصفحة، وقد أضاف إلى فرحتي سعادة ما بعدها سعادة .

هكذا … انطلق المدون / وليد الزهيري من العالم الافتراضي إلى أرض الواقع وإن كان على استحياء إلا إنها تعد خطوة لا بأس بها، إليكم جميعاً أهديكم هذا النجاح، لقد منحتموني الثقة في أني أملك من الأدوات ما يمكنني من تناول عمل فني بشكل نقدي لا بأس به وقد دفعتموني دفعاً لأن أأخذ خطوات أكثر إيجابية في هذا الاتجاه، أتقدم بالشكر إليكم جميعاً أنتم ومن … قد يمر من هنا دون أن يترك آثر لكني أشعر بدبيبه … فإليه أهديه هذا النجاح.
تحديث:
جدير بالذكر أنه تم نشر موضوع ثاني لي على موقع محيط بصفحة الفن أونلاين حول فيلم "Crossing Over" ولكي ينال كل ذي حق حقه الفضل كله بعد الله عائد لصاحبة مدونة "قلب ينبض بالحب" التي كان لها دوراً بارز في نشر هذا المادة هناك.

الاثنين، 1 سبتمبر 2008

اللهم تقبل منا رمضان


Powered By Blogger
All Rights Reserved © Waleed AlZhairy - 2008/2013

وليد الزهيري © 2008. Template by Dicas Blogger.

TOPO