الخميس، 10 أبريل 2025

ليدي من وسط البلد

مقدمة

أراد "الخديوي إسماعيل" أن يجعل من القاهرة عاصمة أكثر حداثة لتضاهي أكبر العواصم الأوروبية، وقد عهد للمهندس "أوسمان" مصمم باريس الجديدة آنذاك إلى وضع مخططات جديدة لشوارع وميادين القاهرة الخديوية منذ قرن ونصف من الزمان وتم بناء عمارات منطقة وسط البلد على الطراز الإيطالي والفرنسي الذي نفذه مهندسون يحملون جنسيات البلدين، وكان يقطن العديد من الإيطاليين واليونانيين في "شارع الملك فؤاد الأول" لوجودهم بالقرب من تجارتهم

تعرض وسط البلد لعدة مراحل من التشويه الأولى كانت حادثة حريق القاهرة يناير 1952، والثانية كانت بعد نمو أتجاه معاكس لدى أعداء القاهرة الملكية من قيادات ثورة يوليو 1952 عندما تم تأميم العديد من المنشأت ومنحها لبعض وزارات الدولة لتعبث بها يد الإهمال وسوء الإستخدام من اشخاص بعيدين كل البعد ثقافياً عن الثقافة المعمارية للمكان مما أوجد تلك الهوه الثقافية … التي أودت بوسط البلد إلى أن يصبح على تلك الحالة من التردي

ويعتبر "شارع فؤاد " من أبرز شوارع وسط البلد ومن أهم ملامحه المعمارية "دار القضاء العالي" وتغير اسم الشارع بعد الثورة إلى "شارع 26 يوليو" ـ يوم مغادرة الملك فاروق لمصر 26 يوليو 1952 ـ في محاولة لطمس الهوية الملكية عن القاهرة، وكان يعتبر هذا الشارع أحد المراكز التجارية الأرستقراطية المميزة لوسط البلد، وتراجعت تلك المنزلة بعد منافسة بعض المناطق الأخرى الأكثر حداثة منتزعه عنه صفته التجارية، وأصبح مجرد متحف مفتوح ذو لوحات معمارية بالية … متنافراً مع رواده من البشر … إلا فيما ندر

--------------------------------------------------

فتحت "هيلين" شنطة يدها الجلدية السوداء، وأخرجت منها دون أن تنظر داخلها بعض الجنيهات التي أعدتها مسبقاً ثم وضعتها أسفل فنجان الشاي بالحليب الذي انتهت منه هو وقطعتان من "الكرواسو" بالجبن، متممه بذلك طقوسها الصباحية لكل يوم "أحد" منذ أكثر من أربعين سنة، ثم دفعت بيديها باب "الأمريكييـن" ونظرت يميناً إلى عمق شارع سـليمان باشا باتجاه "سينما مترو" للتأكد من أن فيلم "Troy" مازال معروضاً

نقلت شنطة يدها من اليسار إلى اليمن، وأنزلت يسراها إلى أسفل وهي تحركها في حركات دائرية عشوائية محاولة أن تتغلب على ضجيج السيارات بصوت غوايشها البلاستيكية ذات الألوان المتعددة ما بين الأصفر والوردي والفسفوري والأحمر، ثم عبرت الشارع عندما أضاءة إشارة مرور المشاة محاولة الإسراع من خطواتها وكانت النسمات الصباحية تداعب شعرها الأبيض لتبدو فروة رأسها من بين خصلاته الخفيفة رغم تدليه على كتفيها، نظرت خلفها بعد العبور لترى ما أنجزته، ثم استدارت معطية ظهرها لـ "دار القضاء العالي" متوغلة في "شارع فؤاد" لممارسة هواية المشي في شوارع وسط البلد

كانت تشق طريقها بين زحام المارة بينما كثير من المحجبات بأعمارهن المختلفة يتعجبن من ملابسها الصباحية الكاشفة عن بعض أجزاء من جسدها المنحني قليلاً للأمام أكثر من المراهقين، فكانت ترتدي بلوزة قطنية "كت" يتقاسم خطوطها العرضية الأبيض والأسود، و"تنوره" ذات نقاط بيضاء وسوداء فضفاضة قليلاً تنتهي فوق الركبة بـ "أوريجانزا" سوداء شفافة كاشفة عن ركبتين هزيلتين، يعقبهما ساقان شديدان اللمعان والتوهج

تطفل عليها أحد الباعة الجائلين معترضاً طريقها لإقناعها بشراء أحد الأحزمة الجلدية التي يحملها بيمينه أو شنطة نسائية من يسراه وكأنه يقدم عرضاً بهلوانياً لا يثير إلا الإشمئزاز، تجاهلته بالنظر لأعلى أحدى العمارات على الجانب الأخر متذكرة جيرانها القدامى ممن كانوا يقفون في تلك الشرفات العتيقة، متأثرة باللون الرمادي الجاثم على زخارفها المعمارية، عادت بنظرها يميناً إلى واجهات المحلات التي لم تلحظ تغيراً يذكر على بضاعتها المعروضة منذ أمد

كان يقف "أشرف" الذي تخرج من كلية تجارة منذ عامين خلف بعض "الإكسسوارات" الحريمي رديئة الصنع التي يضعها أمامه على لوح خشبي أسفله كارتون به بضاعته، ويقف دوماً على أهبة الاستعداد حتى إذا ما داهمته "شرطة المرافق العامة" ساعده بنيانه القوي الرشيق في إعادة كل معروضاته إلى الكارتون وحملها بيد واحدة ولوحه الخشبي في الأخرى مندساً في أحد الشوارع الجانبية، ثم يعود مجدداً بعد زوال الخطر

لفت نظر "هيلين" من بين معروضاته "عقد" قرمزي اللون، أبدت عدم الإكتراث به وهي تسأله عن ثمنه، بلكنة الأجانب المقيمين في "قاهرة المعز" منذ عقود

ـ كم سعر دي؟

أدرك بخبرته أن "العقد" قد أعجبها وإنها لن تتركه رغم نظرة عدم الإكتراث التي تبديها

ـ فيفتي باوند يا مدام

أجابت بذهول

ـ خمسين جنيه غالي كتير، أنا يستري دي بعسرين جنيه بس

هز رأسه يمينا ويساراً نافيا

ـ نو مدام، ثيرتي باوند أوك

ـ خبيبي أنا واخدة يونانية عايسة في مصر قبل ما يسوف أنت دنيا، وأعرف أسعار كويس

أجابها مداعباً

ـ أخب الزتون … الكلماتا

ابتسمت لمداعبته، وهي تخرج من شنطة يدها خمسة وعشرون جنيهاً

ـ أنا أخب دم خفيف بتاع مصريين، مس ممكن يتغير مصري أبداً

أنحنى لأسفل كي يخرج "كيس" من الكارتون، وضع فيه العقد واخذ الخمسة والعشرون جنيهاً حامداً ربه على بداية رزقه لهذا اليوم

ـ مبروك مدام
ـ ميرسي كتير


عبرت "هيلين" تقاطع "شارع شريف" مع "شارع فؤاد" مستمرة في طريقها، أخرجت العقد من كيسه أثناء سيرها ونظرت إليه متأمله طوله وجعلته دائرتين متساويتين ثم وضعته حول رقبتها، وتوقفت أمام الواجهة الزجاجية لأحد محلات الأحذية متأملة العقد، ممسكة بإحدى حباته وجذبتها لأسفل مما جعله ذو حلقتين أحدها صغيرة تحيط برقبتها تماماً والثانية متدلية على صدرها النحيل، ثم رفعت نظرها لأعلى قليلاً ورأت على زجاج المحل وجهاً باهتاً … ابتسمت له ابتسامة حزينة وتركته … منعطفة يميناً متوارية بين زحام وسط البلد

62 Comentários:

Lyssandra يقول...

:)
صباح الخير يا وليد

....

أكتر حاجه بتشدني في البوستات من النوع ده
الصورة اللي باشوف الأشخاص بتتحرك في إطارها
صور واقعيه أوي
وبسيطه أوي
وممكن كلنا نشوفها وتعدي علينا عادي جداً

لكن معايشتها بالطريقة اللي بتوصفها .. بجد رائعه

...

وفعلاً .. ليـــدي .. ليدي بنت بلد
ههههههههههه

....

بجد مش عارفة أقول أكتر من كده
بس الصورة هايلة أوي رغم بساطتها

تحياتي يا وليد
وسلامي لمهند .. أخباره إيه ؟ وعامل إيه في المذاكرة ؟


سلام أخي
Lyssa

سواحة يقول...

خلوة الخدودة خبيبى كثير :-))

و الله فكرة نكتبلك مرة عن مصر الجديدةولا تعرفها؟؟
هى ليها مذاق الزمن و بيحاولوا يشوهوها بس لسه بتعافر زى وسط البلد

قوس قزح يقول...

بص بقى يا ابن الناس
هى دى منطقتك
هنا موهبتك
انك تخلى عيوننا تتفرج على خيالك كانه مشهد سينمائى

ركز على الجزء ده الله يخليك ..عايزين قريب اوى نقرا اسمك فى الكتب و المجلات و افيش السينمات
بس خلاص :)

صيدلانيه طالعه نازله يقول...

بحب اوى يا وليد النوعيه دى من القصص القصيره
تحس و انت بتقراها انها بورتريه مرسوم و كل ما نقرا سطر ملامح الشخصيه تكتمل الى ان تظهر واضحه فى نهايه القصه
جميله قوى اما بصت فى الفاترينه عشان تضبط العقد و شافت وجه باهت ابتسمت له و كملت حياتها
جميييييييييله قوى و تسلم ايدك عليها

!!! عارفة ... مش عارف ليه يقول...

مساء الخير ليساندرا :)

شكراً لكلماتك الرقيقة


وعجبني اووي رأيك في بنت البلد دي
هههههههه

مهند الحمد لله بخير وخلص مذاكره اهو بيكوي لبس مدرسته علشان يقوم ينام بعدها

وهو بيسلم عليكي كتير واتبسط اووي لما قولت له على سؤالك عنه النهاردة


أخوكي
وليد

mostafa rayan يقول...

عارف ياوليد جمال القصه دي مش فى القصه ولا فى اسلوب السرد لأنه مافيش قصه ولا احداث ( واحده اشترت عقد من وسط البلد فين بقى الحكايه ) لكن جمال القصه دي فى دقه وصف التفاصيل اللي بتخليك تعيش الحاله وكانها قدام عنيك وكانك قاعد فى السنيما بتفرج على فيم روائي قصير
عارف القصه دي بتحمل دلالات كتير قوى حتى لو ماكنتش كتبت المقدمه كانت هتتفهم من الاحداث بدايه من عبث الأنظمه الحاكمه بعد الثوره وعدم تقديرها لمثل هذه اللوحات المعماريه التى لا تقدر بثمن وذلك الجين الموجود فى المصرين المسمى حب هدم اي اثار سابقه حتى لابقى إلا انت فى الصوره كان الفراعنه القدماء يهدمون اثار من قبلهم حتى لا يذكر إلا اثارهم هم واستاد القاهره كان اسمه استاد ناصر والان كليه الشرطه تحولت لأكاديميه مبارك للأمن
حتى حب اليونانيون والارمن القدماء لمصر وعشقهم لها رغم كل التغيرات التى حدثت إلا انهم يحبون مصر ويحبون ان يعشيو فيها ويتذكرن الماضي ويتندرون عليه ليس لأن الماضي يحمل ذكرياتهم فقط ولكن الاهم الماضي كان احلى كانت الناس بتهتم على الاقل كانت الشوارع نضيفه وفي كمان اشاره لشيء يتمتع به هؤلاء ونفتقده نحن هو حب الحياه وفن الاستمتاع بها ولو بأقل الامكانيات الست دي رغم كبر سنها وحالتها الماديه الضعيفه إلا انها بتحب الحياه وبتحب تعيشها وتتمتع بيها رغم نظرات المصريين المعيبه والرافضه لها يعنى اكيد الستات اللي كانو بيبصوولها باستغراب دول حالهم بيقول جمل من نوع ( شوف الوليه العايبه - او يا وليه روحى دوريليك على تربه اندفنى فيها ) لأن احنا ماعندناش الفن ده ويمكن ده سبب تقدم الغرب حبهم للحياه علشان كده بيفكرو ازاي يتقدمو ويحسنو الحياه اللي عايشنها وده مالوش دعوه بالفقر ولا الغنى ولكن بطريقه تفكير بدليل ان لما حد عندنا ربنا يفرجها عليه بقرشين اول حاجه يفكر فيها يروح يشتري تربه واول حاجه نعملها فى العيد بعدالصلاه نروح المقابر وعادي قوى تلاقى يوم العيد الناس لابسه اسود ورايحه المقابر رغم انه ده عيد يعنى فرحه وانبساط لكن احنا بنخليه موت وحزن ومقابر وسواد وعمرنا ما هنتقدم إلا لو حبينا الحياه وحبينا نعيشها علشان نقدر نعمر فيها وصدقنى ده مالوش دعوه بالكلام اللي بيتقال اننا شعب متدين لأن امرنا بتعمير الحياه والسعى فيها وفى الحديث ان لو الساعه قامت وفى يد احدنا فسيله فليغرسها
القصه كمان فيها تشابه كبير بقصه علاء الاسوانى ( "دام زتا منديس " صوره اخيره) لكن انت اسلوبك اكثر رقه ونعومه
القصه تحتمل الكتير وانا طولت عليك قوي

mostafa rayan يقول...

شوفت بقى يا عم قصتك عمت فيا ايه رغم انى كتبت مقاله طويله عريضه لكن نسيت اقولك اهم حاجه كل تحياتى ومحبتى لك يا جميل

ميرا ( وومن ) يقول...

بجد مش لاقية تعليق أحسن من تعليق قوس قزح

بجد هي دي منطقتك بتكتب قصص من لحم ودم وأصوات

dr.lecter يقول...

وتيجوا تتهموني اني بانتقد الثوره؟

اهو انت بنفسك قلت اللي فيها من غير اي حوار كفايه اننا حسينا بالتغيير اللي حصل للبلد

طبعا مش محتاج اتكلم عن براعه وصفك لملامح الست وانك خليتنا نحس بها من جوه

وسط البلد دي علي اد مابحبها علي اد مبكره الناس اللي بقت موجوده فيها دلوقتي لانهم فوضويين وغوغائيين بوظوا كل حاجه بجد

عارف انزلها الساعه 7 الصبح او 2 بالليل وانت هتعيش بجد

دعاء مواجهات يقول...

الوصف الدقيق ممتع لم يصيبنى بالملل
انتظر باقى القصة

تبدور مشوقة ..

اشكرك

rovy يقول...

ازيك يا وليد ..
بجد كانت وحشانى قصصك المشوقه جداا و اللى بتقدر بأسلوبك المبدع و تصويرك الرائع للاحداث تأخذنى لأذوب بين شخصيات و اماكن و احداث قصتك الى اخر حرف بها

تحياتى لك و لأبداعك الدائم

صفــــاء يقول...

مش فاكرة مين بصراحه كان بيكتب التفاصيل فى لوحه متحركه زيك كدة بالظبظ

وواحدة رغم السن عايشه ومنطلقه وبتلبس وبتشترى اكسسوارات

واحدة بتقاوم العجز والقبح زيها بالظبط زى وسط البلد

عين فى الجنة يقول...

جميلة فعلا ، برافو

!!! عارفة ... مش عارف ليه يقول...

Wanda
********

مرسي كتير :-))

مصر الجديدةفعلا لها سحرها الخاص

ويمكن أكتر مرة حسيت بده كان في فيلم

أرض الأحلام لداوود عبدالسيد

واحداثه كلها بتدور في مصر الجديدة وكتير من مشاهد الفيلم متصورة في الشارع

!!! عارفة ... مش عارف ليه يقول...

قوس قزح
***********

حاضر يا ماما حاضر :$

هركز واسمع الكلام

بس خلاص :)

!!! عارفة ... مش عارف ليه يقول...

صيدلانيه طالعه نازله
*********************

"جميله قوى اما بصت فى الفاترينه عشان تضبط العقد و شافت وجه باهت ابتسمت له و كملت حياتها"

الجملة دي هي لب الموضوع

شكراً جزيلاً على الإطراء :)

z!zOoOo يقول...

السلام عليكم

ازيك يا وليد

معلش عارف اني بقالي كتير مش باجي عندك

لكن انت كمان ناسينا يا عم

:)

علي فكره انا مقريتش عندك مقال

انا فعلا اتفرجت علي فيلم روائي قصير

عن وسط البلد الي انا مشوفتوش قبل كده

بجد مزج جميل ما بين حاله البلد القديمه والحديثه

وبرضه مع مزج إنطباعات واحاسيس الناس القديمه والناس الجديده

الي كلها تشير وتثير الاستغراب في النفوس من قدر التغيير الحادث

بجد يا وليد

برافو

:)

بجد ومن غير مبالغه ولا نفاق

احلي حاجه بحب اجي عندك عشانها وعند بعض الناس

إني بلاقي تدوينه مختلفه

بجد ربنا يوفقك

وبإذن الله بتمناك قريب

اقرا اسمك في جرنان كبير

واروح اشتري كتابك

واقول الراجل ده انا اعرفه

:)

تحياتي

يا مراكبي يقول...

لقطة جميلة .. أنا بحب النوع ده من اللقطات جدا وخصوصا إنه بيعيشنا لحظات من زمن جميل ما لحقناهوش للأسف

الغريب إني ما حسيتش إن الموضوع شخصي أبدا بالليدي اللي إنت إتكلمت عنها .. أنا الحالة اللي عشتها أثناء القراءة للنص هي حالة القاهرة كلها ككل .. أو يمكن حالة مصر كلها كدولة .. اللي كانت في يوم من الأيام ليدي بجد .. والنهاردة بقت مسخ

إنزل دلوقت وشوف وسط البلد عاملة إيه .. تشوه معماري رهيب بسبب المحلات والبسطات والناس والزحام .. حاجة بقت تغم

donya يقول...

مساء الخير
اول زياره للمدونه
البوست جميل جدا
لما بيجي فيلم ابيض واسود من بتوع زمان تيته تفضل تقول شايفين المباني جميله ازاي والناس شيك
والشوارع نظيفه ازاي
وتحس في عينيها دمعه محتاره
وتقول الله يرحم زمان

القصه كمان جميله اوي مكتوبه ببساطه شديده

تحياتي

كيكى عوووووو يقول...

مممممممممممممم
وانا بقراها قلت ياترى نهايتها ايه!!!
أثاترت اوى فيا لمة بصت على ازازة المحل وبصت لنفسها بحزن واسى
***وجعتنى دى اوى**
انت عملت قصة من تفصيله صغيرة اوى!!!
رغم كدة طلعت فى الاخر هادية ورقية
***************
غير كدة ازيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييك
من هنا لحد بكرة الصبح ويااااااااارب تيجئ قريب اوى
ربنا يحفظك

Aиgel يقول...


مساء الورد

أزيك يا وليد ؟؟
عامل ايه يارب تكون بخير يارب

كعادتك دوماً تختلف عن الآخرين
تعرف أنا بحب أجي هنا ليه
عشان بلاقي معلومات بتفيدني بجد
وسعيدة أني بعرفها من مدونتك (:


........

والقصة جميلة أوي وهادية وتحسها واقعية أوي وبردو كالعادة يا وليد ليك اختيار موفق في اختيار أسامي البوستات بتاعتك (:
راقت لي جداً

دمت بكل ود واحترام ..
سلامي لك ولأسرتك الطيبة (:

Angel love


صحيحي أنا مدبساك في تاج كبير شوية هههههخخخ ابقى عدي استلم بقى وجاوب عليه براحتك إن شاء الله تقوم بتجزأته (:


micheal يقول...

بصفتي واحد من سكان وسط البلد بقولك البوست ده هايل
وصفلك للشوارع ..فعلا حسستني أن جولة هيلين دي في وسط البلد
اما بخصوص الخديوى إسماعيل فأنا تملي أقول عليه لو كان الراجل عمل نص الكلام دخ بس بموارد مصر الحقيقية لكان أفضل حكام مصر على مدى التاريخ ولكن مصيبته أنه فتح باب الاستدانة على مصراعيه وحصل اللي حصل بعديها
تحياتي

lostlove يقول...

قصه جمده بجد
انا عيشت القصه وشفت الشارع وحسيت اني مشيه في الحظه ديه معها
كلام فوق الوصف
تحياتي
واتمني التوفيق

Unknown يقول...

وسط البلد!
كانت فسحتنا
لما شببنا عن الطوق
رايتها وانا طفلة صغيرة
واسعة رحبة خلابة جميــــلة
مع الايام كبرت أنا و(هرمت هى)
فضاقت فى نظرى و(بهتت فى عينى)
وعلاها التراب والاهمال فى
كثير من أماكنها!

Unknown يقول...

فكرتنا بذكريات
وأماكن أكن لها
ود جميـل
الامريكين
أتراهـ لا زال موجوداً ؟

r يقول...

بدايه كل سنه وانت بخير نحن فى عام هجرى جديد

احب كثيرا وسط البلد فى شئ واحد انى فعلا بستمتع بمبانيه الغريبه عليا
وبسبب وسط البلد حاليا بقيت ببص على اى مبنى احس انه قديم شويه من فوق لتحت لاكتشف تمثال مثلا او اى شئ غريب يدل على عصر مضى

القاهره تحديدا مدينه ساحره وان كنت لم اشاهد كل معالمهما وشوارعها بس وسط البلد لفيتها تقريبا من سنتين اخر عهد بزيارته لم انزل وسط البلد من سنتين تقريبا

بالنسبه لهلين عجبتنى ايضا لانها لم تعيش فى مصر لولا انها وجدت شئ تنبهر بيه وتندهش لوجوده حتى فى غياب من كانت تعرفهم من عهد مضى

دى مصر باختصار حاضنه لاى حد مش يحبها يعجب بيها حتى

دمت بخير

Mina يقول...

اقول ايه بس
ربنا يسامحه بقي اللي كان السبب
صاحي من النوم بدري شوية قلت ابص علي الدنيا قبل ما انزل الشغل تقوم تتحفني باللي قريته ده؟
ربنا يسامحك ياعزيزي
ايه الجمال ده
ايه اللوحة الفظيعة دي
صدقني ولا اعظم مهندس معماري يقدر يرص البنيان بتاعك ده
علي قد ما اللوحة حزينة وصادمة علي قد ماهي رشيقة وجميلة
دمت مبدعا يا استاذي العزيز

حواء يقول...

حقيقى قصتك حلوة اوى وعشتها وعشت شوارعها وتخيلت تلك العجوز المراهقة فى ملابسها رغم ان ده بالنسبة لهم عادى جداوعجبنى اوى وصفك لطريقة كلامها رغم انها عايشة فى مصر لكن معتزة بالعربى المكسر اللى بيميز الاجانب اما بيتعلموا العربى والفصال اللى فى طبع المصريين ماهى كدة بقت مصرية صميم بجد معجبة بالبوست والحالة اللى عشتها ووصفك وكلماتك .. تحياتى

حسن ارابيسك يقول...

مقطع جميل وبسيط لعابرة عجوز لمنطقة وسط البلد
خليني الأول بس قبل ما أنسى أشيد بالمقدمة التي هي من ألوياتي لفن العمارة فعندما أنزل لوسط البلد الحقيقة أكون سعيد ومهموم في نفس الوقت سعيد لرؤية مدارس مختلفة من العمارة الأوربية على مختلف أطرزتها ومهموم وحزين فعلاً لحالة التردي التي وصلت إليها وللأسف نحن هنا في مصر لانمتلك حكومة وشعباً ثقافة تذوق الجمال حتى نحافظ عليه
فنبذتك أو مقدمتك لمحة جميلة منك ولكن لي مأخذ عليك حول المقدمة والحدونة البسيطة
كان من الأجمل ياصديقي العزيز أن تربط المقدمة بالحدوتة دون هذا التقسيم وذلك بتضمين تلك النبذة عن منطقة وسط البلد وتاريخها وتاريخ عماراتها المميز من عهد الخديو إسماعيل في قصتك مشهد من هنا ومشهد من هناك
أي كل مشهد لبطلتك يتداخل مع مشهد للمنطقة بمفرادتها أي بمعنى مره بمرورها في شارع كذا فتتكلم عن الشارع ومرة بتاملها بعض العمارات فتتكلم عن العمارات وهكذا

كان عتابي فقط على بطلتك وعلى ذوقها السئ في ملابسها فسيئ جداً أن يرتدي نصف ملابسه مخططة والنصف الأخر منفقط أو حتى كاروهات

لكن دعني أقول لك كانت لغتك بسيطة ومقنعة
تحياتي
حسن أرابيسك

RASHA يقول...

القصة وتفاصيل وصف السيدة والصوة رائعة يا وليد

Tears يقول...

تحية على اسم المدونة المبتكر

شيماء زايد يقول...

روعة انسانيه تاريخيه سياسية مبهره
رسمك للمشهد غايه في الابداع
أحييك بشده

أسوور يقول...

قررت بعد احداث ماتش مصر والجزائر فى السودان ان اصنع اكبر علم فى العالم
أكبر علم فى العالم لازم يكون مصرى
وبالفعل اتخذت خطوات جدية فى تنفيذ المشروع
سجلت فى موسوعة جينيز للأرقام القياسية
سجلت الفكرة فى الشهر العقارى
انشأت جروب على الفيس بوك تحت عنوان
المصريون يصنعون أكبر علم فى العالم
تحت شعار مصر هتفضل غالية عليا
شارك فيه الآلاف من المصريين العاشقين لمصرنا الحبيبة
شاركوا بالجهد والفكر والدعم المعنوى
قررت عرض العلم فى مهرجان ضخم يليق بمصر
سوف يتفتتح المهرجان شخصية عامة
يحضره الفنانين وكبار رجال الدولة
لا سياسة ولا دين ॥ كلنا مصريين
اعتمد على المدونين المتحمسين للفكرة للترويج لها
اعتمد على الإعلام التدوينى واتوجه لزملائى المدونين لدعمى معنويا واعلاميا
صورة الحملة على المدونة ॥ رجاء وضعها على مدوناتكم للترويج للحملة
توقيع
آسر ياسر

تايه في وسط البلد يقول...

العزيز وليد

لم يكن من اللائق ان يكون التدوين عن وسط البلد وانا اتأخر عنه

المقدمة التي بدأت بها صحيحة في معظمها وان كانت الثورة لم تهمل في المباني انتقاما بكل تأكيد..ان القبح الذي حط علي البنايات هناك هو منا نحن.. المصريين الذين سكنوا ديارا لم يعرفوا قيمتها..وهاهي الثورة قد صفت أعمالها منذ سنوات طويلة ومازال مسلسل الاهمال مستمرا

كما ان سنة الحياة في التغيير لم تكفل للشارع البقاء كمركز تجاري ( وحيد ) ولكن حين اتسعت العاصمة صار لها اكثر من مركز..وان كان الشارع اعرقهم الا انه ليس اقواهم

بالنسبة للحدوته فهي جميلة جدا و تعتبر مارش وداع لغروب حزين لتلك الايام الجميلة

دمت بخير ولك التحية

-_- يقول...

انا من عشاق مصر الملكية

فشكووول يقول...

يا سلام يا وليد

انا فتحت الجرح اللى بقى عند معظم المصريين..

مشكلة مصر الكبيره فى العسكر اللى احتلوها سنة 1952 بوظوا البلد وبوظوا السياسه وبوظوا كل حاجه وودونا فى داهيه

بس بعد الست ما اشترت العقد .. ايه اللى حصل .. والا انت عايز تسيب النهايه مفتوحه وانها حتضيع فى الزحمه زيها زى اى حد واى حاجه

تحياتى

!!! عارفة ... مش عارف ليه يقول...

mostafa rayan
**************

شكراً جزيلاً على كلامك الجميل ده يا مصطفى

وبالنسبة للمقدمة، وجهة نظرك في محلها فقط كل ما أردت الإشارة إليه هو التمهيد لمكان الأحداث والذي لا يقل أهمية عن بطلة القصة

أما عن تقيمك للقصة مقارنة بقصة علاء الأسواني هو تقدير كبير لا أستحقه وإن كنت أتفق معك لأني لم أعجب بمجموعته القصصة "نيران صديقة" ورأيت أنه أبرع في الرواية أكثر منه في القصة القصيرة

ويا سيدي أرغي براحتك ، وإن شاء الله تكون حفلة توقيعك كللت بالنجاح بإذن الله ، أنت تستحق كل خير يا مصطفى

وأعتذر لك عن التأخير في الرد عليك، أنا برد على التعليقات دلوقت من سايبر والله يا درش

!!! عارفة ... مش عارف ليه يقول...

وومن
*****

شكراً جزيلاً ميرا

الأمر كله يرجع لتذوقك العالي

تحياتي

!!! عارفة ... مش عارف ليه يقول...

dr.lecter
***********

ومين يقدر يلومك

إنما كل مرحلة ولها إيجابياتها وسلبياتها


أنا كمان من عشاق وسط البلد أطراف والليل وأناء النهار

!!! عارفة ... مش عارف ليه يقول...

دعاء مواجهات
***************

شكراً جزيلاً دعاء

القصة خلصت هنا :(

!!! عارفة ... مش عارف ليه يقول...

rovy
*****

شكراً جزيلاً

أنا كمان كنت مفتقد تشريفك هنا

تحياتى لحضورك بعد الغياب

!!! عارفة ... مش عارف ليه يقول...

صفــــــاء
*************

يمكن أكون فاكر مين بيكتب كده
ولا أدعي إني أشبهه لذلك لن أذكر أسمه حتى لا أقارن به


"واحدة بتقاوم العجز والقبح زيها بالظبط زى وسط البلد"

هو ده بيت القصيد

!!! عارفة ... مش عارف ليه يقول...

راجى
******

شكراً جزيلاً

!!! عارفة ... مش عارف ليه يقول...

z!zOoOo
*********
وعليك السلام

طبعاً لك كل الحق تقطع فيا

بأعترف لك إني مقصر في حقك كل التقصير

وبالرغم من تقصيري إلا أنك أغدقتني بثاء لا أستحقه

وإن شاء الله دايماً أكون عند حسن ظنك بالمدونة
وإن شاء الله سيأتي اليوم الذي أقول فيه أن من له هذا التعليق

صاحب فضل علي

!!! عارفة ... مش عارف ليه يقول...

يا مراكبي
************8


"الغريب إني ما حسيتش إن الموضوع شخصي أبدا بالليدي اللي إنت إتكلمت عنها .. أنا الحالة اللي عشتها أثناء القراءة للنص هي حالة القاهرة كلها ككل .. أو يمكن حالة مصر كلها كدولة .. اللي كانت في يوم من الأيام ليدي بجد .. والنهاردة بقت مسخ"


الكبير ... كبيررررررر

!!! عارفة ... مش عارف ليه يقول...

donya
*********

مساء الورد

إن شاء الله مش الزيارة الأخيرة

كل زمان وله مزاياه وعيوبه


تحياتي لتشريفك الاول
وليد

!!! عارفة ... مش عارف ليه يقول...

كيكى عوووووو
*****************8

"أثاترت اوى فيا لمة بصت على ازازة المحل وبصت لنفسها بحزن واسى
***وجعتنى دى اوى**
انت عملت قصة من تفصيله صغيرة اوى!!!"

جبتي التيمة يا كيكي يا جااااااامد

------
وإن شاء الله تسمح الظروف بلقاءات عديدة زي السنة اللي فاتت وأكتر بإذن الله

!!! عارفة ... مش عارف ليه يقول...

Angel
**********

مساء الورد

الله يسلمك عبير
ميرسي على كلامك الجميل ده
ويارب تقدر المدونة دي دايماً عند حسن ظنك .. وتلاقي فيها المختلف دائماً والمعلومة التي تنتظريها

وبالنسبة للتاج الكومبو .. شوفته وأدبست فيه :)

وإن شاء الله تشوفيه قريب هنا

!!! عارفة ... مش عارف ليه يقول...

micheal
*********

"بصفتي واحد من سكان وسط البلد بقولك البوست ده هايل"

ما أظنش أني محتاج شهادة أكبر من كده من واحد من سكان وسط البلد

الخديوي إسماعيل شخصية ظلمها التاريخ المشوه ولولم يحدث ما ذكرت ربما كان الأفضل على الإطلاق

بس زمانه مطوعهوش

!!! عارفة ... مش عارف ليه يقول...

lostlove
**********

شكراً لك ..

وسعيد بزيارتك الأولى

وإن شاء الله متكونش الأخيرة

!!! عارفة ... مش عارف ليه يقول...

norahaty
***********

وسط البلد! هي فتاة أحلام الكثيرين
إلى أن أصبحت مرتع للمتحرشين من كافة الأطياف

"الامريكين
أتراهـ لا زال موجوداً ؟"

نعم أراه لازال موجوداً .. على أرض الواقع ..

وإن ذهبتي إليه ولم تجديه مثلما كان ... فيكفي أنه لازال موجوداً بداخلك


أسعد دوماً بحضورك

!!! عارفة ... مش عارف ليه يقول...

بسنت
**********

كل سنة وأنت طيبة بسنت :)

وسط البلد مثلما تركتيها منذ سنتين .. وربما تشوهت شوارعه من رواده أكثر من هرم مبانيه

مصر حاضنه لكل الثقافات فعلاً

تحياتي

!!! عارفة ... مش عارف ليه يقول...

Manamino
**************

وأنا كلي أسف وخجل
لأني أفسدت عليك صباحك :)

الشهادة دي لما تيجي من باشمهندس
تبقى حاجة جامدة اوووووووووي

"علي قد ما اللوحة حزينة وصادمة علي قد ماهي رشيقة وجميلة"

قد يكون السر في صدمتها

!!! عارفة ... مش عارف ليه يقول...

حواء
********


شكراً جزيلاً على كلامك الجميل ده

وإن شاء الله تبقى المدونة عند حسن ظنك بها


تحياتي
وليد

!!! عارفة ... مش عارف ليه يقول...

حسن ارابيسك
**************


خليني أنا كمان أقولك إني بنتظر تعليقك هنا لأني فعلا أعتز به

بالنسبة للمقدمة فكرت مثلما قلت أنه من الممكن أن يتضمنها النص هنا أو هناك ، لكن ما جعلني أتردد في هذا هو جفاء تلك المقدمة التاريخية والتي إن جاء على لسان أحد الشخصيات ربما تحولت الحوار إلى شكل تلقيني اشبه بحصص التاريخ

لذا استقريت على أن تكون في المقدمة كتمهيد لبقية الأحداث وتهيئة القارئ لما هو مقدم عليه ... وربما نتفق أو نختلف إلا أن ملاحظتك أخذت مني الكثير من الوقت بين أفعل أو لا أفعل

وبالنسبة للملابس البطلة والذي لم يتجاوز اللونين الأبيض والأسود فهو المقصود منه وضوح الرؤية لديها والثبات الإنفعالي وأنها تعرف كيف تتخذ طريقها

شكراً جزيلاً على هذا الحوار البناء

وأتمنى دوام التواصل

تحياتي
وليد

!!! عارفة ... مش عارف ليه يقول...

رشا
*******

شكرأً جزيلاً رشا

كنت أنتظرك لمعرفتي بعلاقتك بوسط البلد
وأيضاً بفن العمارة

أنا كمان صورة السيدة فُتنت بها :)

!!! عارفة ... مش عارف ليه يقول...

Tears
********

شكرأً جزيلاً
إن اسم المدونة عجبك

وإن شاء الله ينال محتواها إعجابك أيضاً

!!! عارفة ... مش عارف ليه يقول...

شيماء زايد
************

لما يجي الكلام ده من حد

ديزاينر زيك

يبقى حاجة جامدة أوووي


شكرأً جزيلاً

!!! عارفة ... مش عارف ليه يقول...

أسوور
********

إن شاء الله ترى الفكرة النور

وتكلل بالنجاح بإذن الله

!!! عارفة ... مش عارف ليه يقول...

تايه في وسط البلد
*******************

أنا قاعد مستنيك من بدري يا باشا
وبقول مش معقول يبقى الفرح منصوب وصاحب البيت ميشرفش

ولا أيه يا عم طلعت



هو كما ذكرت مارش وداع لغروب حزين .. ولكن لمن ؟؟

!!! عارفة ... مش عارف ليه يقول...

Sharm
**********

لكل من الملكية والجمهورية

إيجابياتها وسلبياتها


تحياتي

!!! عارفة ... مش عارف ليه يقول...

فشكووول
**** *******

دايماً بيسعدني تشريف مقاتل من أبطال 73

النهاية كما ذكرت مواربه شوية

"وحتضيع فى الزحمه زيها زى اى حد واى حاجه"

فكل التحية لك

Powered By Blogger
All Rights Reserved © Waleed AlZhairy - 2008/2013

وليد الزهيري © 2008. Template by Dicas Blogger.

TOPO