وليد الزهيري في نص اليوم

لقاء مباشر مع وليد الزهيري في برنامج "نص اليوم"

 مع الإعلامية جواهر التميمي على قناة الصباح الكويتية .

دار القاء حول مجموعته القصصة "ليدي من وسط البلد"

وكتاباته النقدية ، بالإضافة إلى مشاريعه المستقبلية .

السلطانية … تاج الجزيرة

السلطانية دي … أقصد التاج ده وصلني من مدونة على الهامش لصاحبتها ليساندرا وبصراحه اتأخرت فعلاً في الإجابة عليه وأرجو أن تتقبل عذري، وأعتقد أن تأتي متأخراً خيراً من أن لا تأتي، وكل الشكر لها لتذكرها مدونتي ضمن المدونات التي أهدتها التاج ، نيجي بقى للجد، والله المستعان


س : من أنت؟

ج: وليد الزهيري


س : ما الذي تفعله هنا؟

ج: بحكي حكايات ممكن تكون جزء مني … وممكن تكون جزء منكم


س : إسرائيل تقصف كل جنوب ممكن بحثاً عنك …أي شمال تقصد؟

ج: بصراحة معتقدش إني هسيب جنوبي، وفي موقف مشابه بعض الشيء وهو أثناء حرب العراق الأخيرة، كنت موجود هنا في الكويت، وكان التهديد بحرب كيماوية مرعب بالنسبة لكل الموجودين هنا، وحركة الطيران قبل بداية الحرب كانت على أشدها ووصلت ناس كتير أصحابي فضلوا إنهم يمشوا، ومسافرتش معاهم في الوقت ده وكانت المشكلة في الصواريخ، وأذكر إن أخر صاروخ عراقي كان من البصرة جنوب العراق وأصاب منطقة بيني وبينها حوالي 500 متر لكن الحمد لله ده كان أخر صاروخ أضرب على الكويت وقتها بعدها تراجع العراق شمالا في اتجاه بغداد وكان مدى الصواريخ لا يصل للكويت والحمد لله، وبناء على التجربة دي معتقدش إني هسيب جنوبي هرباً لأي شمال


س : أنت مكلف بحذف حرف من حروف اللغة العربية أيها ستختار … ولماذا؟

ج: مفتكرش أن في حرف محتاج حذف إنما في مشكلة عانى منها صديق لي من جنسية أجنبية ولا يتكلم العربية لكنه كان بيحاول يتعلمها وكانت معاناته مع اللغة العربية في النقاط التي فوق الحروف، وكانت تسبب له أزمة حقيقية ووقتها كتب لي الحروف كلها بدون نقاط ثم بدأ بإضافة النقاط وهو متأفف مشيراً بالقلم هنا وهنا وفوق وتحت، وقال اللغة الإنجليزية فيها حرف واحد بس اللي محتاج نقطة، ليه النقط كتيرة عندكم؟ وبصراحه أشفقت عليه، وقولت له مشكلتك مع أبو الأسود الدؤلي ، هو اللي وضع النقاط على الحروف وهو سبب أزمتك معها


س: لو قدر لك أن تدخل السجن فما القضية التي تتمني أن تدخل بها إليه؟

ج: نسأل الله العفو والعافية


س: متى اكتشفت نفسك؟

ج: معتقدش إني أكتشفتها ولا حاجة


س: على مفترق طريق لافتتان اليمنى تقول إلى حلمك والثانية تقول إلى مالم يحلم به بشر … أي الطرق تسلك؟

ج: إلى حلمي لأن حلمي هو مالم يحلم به بشر قبلي


س: نحن لا نعيش حياتنا بل نتعلم فيها كيف نعيش … مع تعليقك؟

ج: موافق طبعاً عليها لأن الجملة دي مشتقة من تعريف السياسة وهي فن التعامل مع الممكن، وإحنا بنحاول نعيش الممكن


س: بجملة واحدة فقط أكتب تعريف لكل كلمة من الكلمات الآتية

ج
الوطن: زي صوباعك لما يوجعك متحسش بيه غير لما يكون فيه جرح، الوطن كده متحسش بيه غير لما تبعد عنه، ومصر وطن عظيم والله … بس إحنا اللي مش حاسين بقيمتها

الأم: الحضن اللي ممكن تترمي عليه وتبكي من غير حرج

الليل: دايماً بشوف الناس بالليل … غير الناس بالنهار، مع إن همه نفس الناس

الحب: الحب في الأرض بعض من تخيلنا … لو لم نجده عليها لاخترعناه

أمريكا: وطن لديه الرغبة والإرادة في أن يحتضن مواهب أبناءه

المرأة: هي النواة التي يدور حولها الرجل، فهي سر ارتباط الرجل بالحياة، في صغره هي الأم، وفي شبابه هي الحبيبة التي يسعى إليها، وفي شيخوخته هي من تؤنس وحدته في أيامه الباقية

الصمت: لحظة استقبال … أفضل كثيراً من لحظات الإرسال

الإنترنت: صديقي الصدوق


س: قيس، عنترة، وجميل… هم الذين يقولون شعراً، وليلى، وعبلة، وعزة صموت… لماذا هذا التغيب للمرأة؟

ج: أعتقد أن صمت المرأة هو ما يزيدها سحراً، وإن كانت صامته فكل ما قاله هؤلاء من شعر قيل فيهن


س: أن تكون مطلوباً في جريمة خير لك من ألا تكون مطلوباً على الإطلاق… هل تتفق مع هذه العبارة؟ علل؟

ج: لا أتفق مع هذه العبارة ، لأنه ليس الأصل أن أكون مطالباً في جريمة والأصل هو أن أكون إنسان سوي ينعم بحياته التي مّن الله علي بها


س: إلى أين تمضي كلمات الحب بعد أن نقولها؟

ج: إن كانت صادقة ستصيب مرماها، وإن كانت غير ذلك قطعاً ستخطأ الهدف


س: هل تجد علاقة بين المرأة وقطاع الطرق؟

ج: لا أعتقد لأن المرأة هي رفيق الطريق وليست قاطع الطريق

س: هذا فراق بيني وبينك … متى ولمن تقولها؟

ج: اللي مافيه خير … تركه خير ، ده مثل كويتي تعلمته هنا، وأقولها لمن شعرت أن علاقتي به أصبحت شبيه بعلاقتي بنافخ الكير


س: كيف هو غداً؟

ج: أسوء من اليوم


س: لمن تمرر التاج؟

ج: اللي يحب يتفضل ميغلاش عليه … دي الحكاية كلها سلطانية

تاج التدوين

بعد 6 شهور من التدوين أعتقد إن التاج ده وصل في وقته لتقييم التجربة والوقوف مع الذات وخصوصاً إن محاور أسئلته كلها بتتعلق بالتدوين ، ووصلني التاج عن طريق مدونة ساعات ساعات وسعدت جداً بالتواصل ده بين المدونين وبعضهم.


1- بدأت تدون امتى … ودخلت العالم دا ازاى؟

بدأت التدوين من 6 شهور زي ما هو واضح من تاريخ أول بوست إنما كان في حاجات كتيرة كتبتها قبل كده والبدايات كانت في النقد السينمائي لأني أحب السينما أووي وبصراحه كنت بشوف ناس بتكتب حاجات مفيش لها علاقة بالفيلم على الإطلاق وبيعتبروا نفسهم نقاد لدرجة أني كنت بتخيل أنهم بيتكلموا عن فيلم تاني غير اللي شوفته ، وكان لي مشاركات أتنشرت على موقع الـ BBC وده طبعأً كان بيتعلق بموضوع الساعة وإذا كان الموضوع المطروح يثير فضولي للمشاركة بالرأي فيه.

وبالنسبة للنص التاني من السؤال … دخلت التدوين ازاي ؟ شوفوا من حوالي سنتين أو أكتر شوية … ألح عليا (س) من الناس بخصوص الفكرة دي بعد ما قرا حاجات كتبتها وكانت الظروف مش بتسمح أو الحماس بيفتر لحد ما جت اللحظة المناسبة وعلى ايد نفس الـ (س) وإصراره إنه يدفعني للتدوين دفعااااااااا وهو كان مؤمن باللي بكتبه وشايف ان فيه حاجة والحمد لله حسيته ده من تعليقاتكم على المواضيع المختلفة … والفضل كل الفضل يرجع للـ "السين" ده في إني بقيت وسطكم هنا.

2- ايه كان انطباعك فى البداية؟

في البداية كنت متوجس خيفة من عدم الانتشار ومدى صعوبته وإني أكون بكتب لنفسي ، ومش معنى كلامي ده أني بقيت علم من أعلام التدوين … أبدا بالعكس في مدونات بروحها ما شاء الله على زورها وانا يدوب أهو في البداية الحكاية كلها 6 شهور لا أكثر ولا أقل، وطبعاً كنت بفرح جداً بأي حد يدخل المدونة ويا سلام لو ساب تعليق على موضوع بكون سعيد جدا … وأكتر حاجة بتسعدني لما يدخل حد جديد المدونة لأول مرة ويعلق على موضوع بحس ساعتها إني كسبت أرض جديدة.

3- مين اكتر واحد بتهتم بتعليقه على بوستك الجديد؟

كل التعلقيات بهتم بيها جدا وبيسعدني التعليق اللي يدل على قراءة واعية ومتأنية للموضوع سواء اختلف أو اتفق معايا في الرأي وإثارة حالة من الجدل بتعتبر نجاح للموضوع سواء مع أو ضد.

4- ايه اهم حاجة اتعلمتها من عالم التدوين؟

التواصل مع المدونين والتفاعل الإيجابي في الفرح أو في الحزن والمشاعر فعلا بتكون صادقة وإن التدوين بدأ يخرج من العالم الافتراضي لأرض الواقع زي مشروع مدونات مصرية للجيب وبؤجة الخير والتفاعل بشكل إيجابي مع اللي حصل في الدويقة وشوفته في مدونة امرأة بعقل رجل والفطار الجماعي في رمضان مع خالد الصاوي في مدونة عندليبيات … كل دي أشكال من التواصل الإيجابي.

وعرفت ناس جامدين اووي زي عبقري الموسيقى الشندويلي صاحب المدونة المتخصصة في الموسيقى التصويرية وفي السينما مثلا في مدونات زي بحب السيما ومدونة 35مم بس صاحبتها مش بتنزل جديد من مدة معرفش ليه ومدونة غريب وطبعا قربت كتير من الفن التشكيلي عن طريق مدونة جاليري وبدأت أفهمه لأني كنت بحبه وبتذوقه بس مش عارف ازاي أفهم أبعاده، وأشعار مدونة عالم الخيال، ومدونة رحايا العمر دايماً تهتم بالحوار مع الذات وتدعيم القيم الإيجابية وتنمية المهارات وكأنك في ندوة للدكتور إبراهيم الفقي، ومدونة طائر النار تحس ان الهدف واضح عندها وبتوصل للهدف بأقصر الطرق ومدونة نبع الأمومة روح قلب ماما ومدونة أنا اللي بالأمر المحال أغتوى مدونة جميلة جدا ومدونة إمرأة بعقل رجل تحس أن في ثراء في مصادرها ومدونة عايزة أتكلم القوة الدافعة لمدونات مصرية للجيب وصحفيتنا اللامعة دعاء مواجهات ، ونضوج التجربة في مدونة راجي ومدونة لقاء الأحبة اللي أول ما تدخلها تشعر بالسكينة والإطمئنان ومدونات بنانيتي خالص زي برينسيس بيري وساعات ساعات و انجيل وإعلامي المدونات خالو أحمد الصباغ ، ومن المدونات اللي دمها خفيف الرائعة والمتجددة دائماً آبي وكمان شفقه وإحسان واللي مشيبة البلوجرية كلهم كيكي وهختم طبعاً أديبنا الكبير مصطفى ريان الثائر بتاع الرباعيات الجاااامد.
وبصراحه خايف أنسى حد أنما عموماً كل حد مدونته موجودة عندى في قايمة الحرافيش اكيد هو حد بحب أتابع مدونته.

5- ايه اكتر حاجة كرهتها؟

تعليق "غير معرف" … إنه حد معندوش الشجاعة الكافية أنه يقول رأيه في العلن ودايماً يا بيقول كلمتين بيعبروا عن البيئة اللي هو جاي منها … أو نموذج تاني من "غير معرف" يدخل بيعمل اعلان لموضوع ما مثلاً ويجري

بعض المدونات اللي تختلف معها في الرأي بيتجاهلوا رايك ومبيوضحوش وجهة نظرهم ويردو عليك … بس دوول اهون من نوع تاني ينزل عليك بالتجريح والإهانات لمجرد أنك قولت وجهة نظر متتفقش مع وجهة نظره

وأخيرا المجاملات المبالغ فيها في بعض الأحيان

6- حاسس ان التدوين له تأثير؟

طبعااااا كل كلامي اللي فووووق ده بيقول أن التدوين له تأثير كبير ومش بس على مستوى المدونين زي البعض ما بيتخيل لا بالعكس إحنا أثارنا اهتمام آخرين وفي برامج تلفزيونية وإذاعية بتابعنا وكتاب كبار كتبوا علينا وقالوا رأيهم في التدوين والمدونين … أكيد كل ده بيقول أن في تأثير … مش كده ولا أيه؟

وتأثيره على المستوى الشخصي ، أعتقد أنه في تأثير إيجابي بمعنى قبل التدوين كنت بدون على فترات متباعدة يعني لو جت في بالي فكرة أو شوفت فيلم عايز أقول رأيي فيه كده يعني وكنت كسول طبعاً لأني بكتب لنفسي ومفيش حماس وبشكل غير منتظم، إنما دلوقت الحمد لله بدأت أدون كل أسبوع موضوع جديد وأنزله في ميعاد ثابت أسبوعياً كل يوم تلات تيمناً بميعاد العمود الأسبوعي للأب الروحي إبراهيم أصلان لان ده ميعاده كل يوم تلات في الأهرام ، والراجل ده له فضل كبير عليا ونصحني مرة نصيحة بإني لازم أقرا كتيررر ودي حاجة مهمة لأي واحد بيدون أو حتى مش بيدون.

والحمد لله بدأت أظهر في جوجل بمجرد ما تكتب اسم المدونة وفي الصفحة الأولى يعني مثلا لو بتدور على اغنية علي الحجار "عارفة مش عارف ليه" هتبص تلاقي المدونة أول حاجة في الصفحة وده نجاح كبيررر بالنسبة ليا إني أكون مرآي على محرك بحث زي جووجل … ومخبيش عليكم فرحت أوي بيه

7- تهدى التاج لمين؟

أهديه لكل الناس اللي أسامي مدوناتهم جت في البوست وطبعاً الحرية متروكة للجميع في الجواب عليه.

واجب

الموضوع ده كان وصلني عن طريق مدونة

Angel Love

والشكر لها لأنها اعتبرتني من المدونين اللي تمرر لهم الموضوع ده على اعتبار انها فرصة إن كل واحد يتكلم عن نفسه بشكل أوسع شوية وبالتالي الناس تعرف بعضها اكتر وأكتر وده واضح جداً من السؤال الأول لان لما حد يتكلم عن 16 صفة فيه أكيد مش هيكون فاضل حاجة تانية يقولها، على العموم هحاول أجاوب وافتكر الـ 16 حاجة دوول وربنا يستر يطلوعوا زي ما يطلعوا … مش هتفرق حتى لو هجيب 50% ودلوقت اتوكل على الله وادخل في الموضوع بقلب جامد

أذكر 16 صفة عن نفسك ؟

أبدء منين أممممممممممم
1
اعتقد إني مهذب وبيقولوا إني عنيد بس طيب والله
2
بحب أووي أعرف ماهية الأشياء يعني اعرف الحاجة جاية منين وراحه فين ولو ليا دور فيها ابقى فاهم دور التروس اللي قبلي والتروس اللي بعدي
3
أصحابي مش كتير أوووي إنما اللي مصاحبهم علاقتي بيهم مؤثرة بالنسبة ليهم وليا
4
اعتقد إني فيررر وممكن أقبل الرأي والرأي الاخر يعني مش متعصب لوجهة نظري ولو اقتنعت عندي الشجاعة الكافية إني اعترف بخطأي وأغير موقفي
5
بحب الشطرنج أووي واخدت جوايز فيه على ادي يعني وفي كمان مرات كتير مطلعتش الأول مثلا السنة اللي فاتت طلعت الرابع على 46 متسابق وكان في بينهم 8 مصنفين من اتحاد الشطرنج ، وانا مش كاسباروف ولا حاجة أحسن حد يفكر أني جامد أووي … وعلى فكرة كاسباروف مش هو بطل العالم دلوقت أنما انا بحبه أكتر واحد علشان له موقف وصاحب قضية
6
دايماً عندي هَم عام شاغلني حتى لو مش قادر يكون ليا دور فيه أنما مهموم بيه
7
أسعد لحظاتي في العطاء حتى ولو ابتسامة في وجه طفل … كل ميسر لما خلق له
8
بحب المالديف أوووي ، وفي علاقة ما بيني وبين البحر … هتصدقوني لو قولت لكم مش عارف اوصف شكل العلاقة دي؟
9
أحب يكون لكل موقف أصل منطقي عندي علشان أكووون رأي بغض النظر عن انه صح أو غلط انما يكون ليا مبرر … اختارت ده ليه
10
عارفين في اغنية بتاعة هنيدي في فيلم "اسماعلية رايح جاي" لما بيقول فيها أنا نفسي أبقى نفسي الخ … المهم يعني أهو أنا بقى "نفسي ابقى نفسي" دي
11
بحب لون الأورينج اوووي وأظن ده واضح في البلوج مع إني مش من النوع المتفائل دايماً
12
بتعامل مع الناس بحسن النية إلى أن يثبت العكس
13
بحسب كل الاحتمالات قبل ما اخطي خطوة ويمكن ده على أد ما هو ميزة … ممكن يكون عيب
14
بالإضافة لحبي للسينما بحب الموسيقى اووووي ولها دور مهم أووي في حياتي لدرجة إن في ناس بتقول عليا لاسع علشان الشطحات الموسيقية اللي بحب اسمعها
15
مش هخبي عليكم زمان مش كنت بحب الورد يعني كنت أقول سباطة موز ولا أبوفروه أبرك لكن بعد كده حبيت الورد اوووي وبقى حاجة مهمة في حياتي … حتى شوكه اتعلمت احبه
16
اه في حاجة كمان قبل ما أنسى بحب قبل ما أدون موضوع لازم أقرا فيه الأول بحيث أن يكون كلامي مبني على أسس زي مثلا قصة قصيرة كنت بتكلم فيها عن النحل اسمها "شهداء بلاط الملكة" وعلشان معلوماتي مش كبيرة في الموضوع ده قريت عن النحل كتير اوووي علشان مقولش أي كلام وخلاص


السؤال الثاني تمرر الواجب لمين؟

مش هختار حد معين اللي عايز ياخده يتفضل لاني تقريباً لقيته في اكتر المدونات اللي شوفتها … لكن في كلمتين أحب أقولهم بالمناسبة السعيدة دي لان الكلمتين دول لهم علاقة بكل اللي فوووووووق ده

دايماً في نماذج من الشخصيات مبتتكررش كتير في حياة كل واحد فينا وممكن تيجي في العمر كله مرة واحدة ممكن تكون "عم ـ خال ـ مدرس ـ جار ـ حبيب ـ صديق" وبيكون وجودهم مؤثر في حياتنا ولحظة فارقة فيما قبل وما بعد، عاملين زي مكتب التنسيق كده مثلا … أكيد الناس دي مش بننساهم وبيفضلوا دايماً جوانا لكل اللي عملوه علشانا … أحب أقدم لهم أغنية عبدالحليم … أعز الناس

تاج ... ؟

كان من المفترض أن يكون هذا البوست لموضوع آخر لكن قدم لي صديقي" مازال الحلم يراودني" هذا الإهداء لأجيب على أسئلته، وأشكره لأنه تذكرني في عالم لا تتعارف فيه سوى أفكارنا، فصديقي هذا شخص ودود جداً للكلمة ويعرف من أين يأتي بها، وهذا ما أفتقده في نفسي.
وليعينني الله في الإجابة على هذه الأسئلة التي في مضمونها أصعب من أسئلة الثانوية العامة؟

يلاااا نشغل الأستوب ووتش
1
2
3

السؤال الأول
أذكر خمس أحلام على الأقل ، تخص ماضيك وتحلم فيها بتغيير أشياء … ماذا ستعدل وماذا ستترك؟

1. عندما قرأت قصة عمر بن عبدالعزيز لأول مرة كان بها حديث نبوي يقول فيما معناه أن على رأس كل مائة عام يأتي رجل يجدد شباب الأمة وكان على رأس المائة عام الأولى عمر بن عبدالعزيز ... وأعتقدت بأنني سأكون ذلك الرجل لهذه المئوية، وبالطبع تأكدت بعد ذلك بأنني لست هذا الرجل
2. حلمت أن أدرس الإخراج في المعهد العالي للسينما ولم يتحقق الحلم، لكني عوضت ذلك بالقراءات الحرة وحضور مهرجانات سينمائية والأسابيع الثقافية والاشتراك في نوادي السينما
3. حلمت بالالتحاق بالكلية البحرية وأن أصبح قبطان يذهب إلى الدنيا ولا ينتظرها أن تأتي إليه
4. حلمت بانني أحيا في فترة النهضة بالستينات وبغض النظر عن أخطائها إلا أنه كان هناك مشروعاً ما يحركنا … نهضة في كل المجالات السياسية والاقتصادية والثقافية، سينما، مسرح، موسيقى، شعر، أدب وفكر … دائماً كنت أشعر إنني جئت متأخراُ بعض الشيء وان هذا ليس بزماني
5. حلمت أن أتعلم الخط لأن خطي سيء جداااااا ولولا الكيبورد ما استطاع أحد أن يقرأ خطي، وكنت ارفع من معنوياتي بعض الشيء بقولي لنفسي … إن العباقرة دائماً خطهم سيء

السؤال الثاني
أذكر خمس أحلام على الأقل … تخص مستقبلك

1. أحلم بيوم يأتي ولا أكون خائف من بكرة
2. أحلم بأن ينتهي إحساس ملازم لي طول الوقت بأنني … طول عمري عايش لوحدي
3. أحلم ببعض الأبديت لنفسي في كرير عملي
4. أحلم بتقوية المستوى اللغوي عندي لأني أعتقد أن لغتي العربية ركيكة قليلا
5. أحلم بقوة دفع تدفعني لأستكمل قراءتي لمادة السيناريو حتى أشبع هوايتي أكثر


السؤال الثالث
أذكر شخصين على الأقل ، متواجدين فى حياتك حاليا … كنت تود وجودهم قبل الآن بزمن

1. هناك شيء ما أشعر بوجوده لكني لا أراه، يتفهم لكل عثراتي ويقدر ايجابياتي، أشعر كأني عروسة ماريونت بين يديه يحرك خيوطها بمنتهى البراعة وبلمسة حانية، كم تمنيت أن أدرك محيطه قبل الأوان بأوان … لكن ليس كل ما يتمناه المرء يدركه
2. الإنترنت … لأنه أحضر لي الدنيا التي لم أستطع الذهاب إليها

السؤال الرابع
أذكر شخصين على الأقل ، غير متواجدين في حياتك حاليا … كنت تود وجودهم الآن أو في حياة أولادك مستقبلا

1. نيلسون مانديلا تمنيته لنا جميعاُ
2. صلاح الدين لأنه سيكون نتاج طبيعي لزمن مانديلا


السؤال الخامس
تهدى التاج لمن … ؟

أهديه لـ …

1. من يعشق السينما
35mm
2. من يعشق الموسيقى
Cinema Music

وفي الختام ... سلام