واجب

الموضوع ده كان وصلني عن طريق مدونة

Angel Love

والشكر لها لأنها اعتبرتني من المدونين اللي تمرر لهم الموضوع ده على اعتبار انها فرصة إن كل واحد يتكلم عن نفسه بشكل أوسع شوية وبالتالي الناس تعرف بعضها اكتر وأكتر وده واضح جداً من السؤال الأول لان لما حد يتكلم عن 16 صفة فيه أكيد مش هيكون فاضل حاجة تانية يقولها، على العموم هحاول أجاوب وافتكر الـ 16 حاجة دوول وربنا يستر يطلوعوا زي ما يطلعوا … مش هتفرق حتى لو هجيب 50% ودلوقت اتوكل على الله وادخل في الموضوع بقلب جامد

أذكر 16 صفة عن نفسك ؟

أبدء منين أممممممممممم
1
اعتقد إني مهذب وبيقولوا إني عنيد بس طيب والله
2
بحب أووي أعرف ماهية الأشياء يعني اعرف الحاجة جاية منين وراحه فين ولو ليا دور فيها ابقى فاهم دور التروس اللي قبلي والتروس اللي بعدي
3
أصحابي مش كتير أوووي إنما اللي مصاحبهم علاقتي بيهم مؤثرة بالنسبة ليهم وليا
4
اعتقد إني فيررر وممكن أقبل الرأي والرأي الاخر يعني مش متعصب لوجهة نظري ولو اقتنعت عندي الشجاعة الكافية إني اعترف بخطأي وأغير موقفي
5
بحب الشطرنج أووي واخدت جوايز فيه على ادي يعني وفي كمان مرات كتير مطلعتش الأول مثلا السنة اللي فاتت طلعت الرابع على 46 متسابق وكان في بينهم 8 مصنفين من اتحاد الشطرنج ، وانا مش كاسباروف ولا حاجة أحسن حد يفكر أني جامد أووي … وعلى فكرة كاسباروف مش هو بطل العالم دلوقت أنما انا بحبه أكتر واحد علشان له موقف وصاحب قضية
6
دايماً عندي هَم عام شاغلني حتى لو مش قادر يكون ليا دور فيه أنما مهموم بيه
7
أسعد لحظاتي في العطاء حتى ولو ابتسامة في وجه طفل … كل ميسر لما خلق له
8
بحب المالديف أوووي ، وفي علاقة ما بيني وبين البحر … هتصدقوني لو قولت لكم مش عارف اوصف شكل العلاقة دي؟
9
أحب يكون لكل موقف أصل منطقي عندي علشان أكووون رأي بغض النظر عن انه صح أو غلط انما يكون ليا مبرر … اختارت ده ليه
10
عارفين في اغنية بتاعة هنيدي في فيلم "اسماعلية رايح جاي" لما بيقول فيها أنا نفسي أبقى نفسي الخ … المهم يعني أهو أنا بقى "نفسي ابقى نفسي" دي
11
بحب لون الأورينج اوووي وأظن ده واضح في البلوج مع إني مش من النوع المتفائل دايماً
12
بتعامل مع الناس بحسن النية إلى أن يثبت العكس
13
بحسب كل الاحتمالات قبل ما اخطي خطوة ويمكن ده على أد ما هو ميزة … ممكن يكون عيب
14
بالإضافة لحبي للسينما بحب الموسيقى اووووي ولها دور مهم أووي في حياتي لدرجة إن في ناس بتقول عليا لاسع علشان الشطحات الموسيقية اللي بحب اسمعها
15
مش هخبي عليكم زمان مش كنت بحب الورد يعني كنت أقول سباطة موز ولا أبوفروه أبرك لكن بعد كده حبيت الورد اوووي وبقى حاجة مهمة في حياتي … حتى شوكه اتعلمت احبه
16
اه في حاجة كمان قبل ما أنسى بحب قبل ما أدون موضوع لازم أقرا فيه الأول بحيث أن يكون كلامي مبني على أسس زي مثلا قصة قصيرة كنت بتكلم فيها عن النحل اسمها "شهداء بلاط الملكة" وعلشان معلوماتي مش كبيرة في الموضوع ده قريت عن النحل كتير اوووي علشان مقولش أي كلام وخلاص


السؤال الثاني تمرر الواجب لمين؟

مش هختار حد معين اللي عايز ياخده يتفضل لاني تقريباً لقيته في اكتر المدونات اللي شوفتها … لكن في كلمتين أحب أقولهم بالمناسبة السعيدة دي لان الكلمتين دول لهم علاقة بكل اللي فوووووووق ده

دايماً في نماذج من الشخصيات مبتتكررش كتير في حياة كل واحد فينا وممكن تيجي في العمر كله مرة واحدة ممكن تكون "عم ـ خال ـ مدرس ـ جار ـ حبيب ـ صديق" وبيكون وجودهم مؤثر في حياتنا ولحظة فارقة فيما قبل وما بعد، عاملين زي مكتب التنسيق كده مثلا … أكيد الناس دي مش بننساهم وبيفضلوا دايماً جوانا لكل اللي عملوه علشانا … أحب أقدم لهم أغنية عبدالحليم … أعز الناس