اجتماع الكراسي الموسيقية

بداية أعتذر عن طول غيابي الفترة اللي فاتت بسبب الأجازة واللي حالت دون تواصلي في الفترة الأخيرة زي ما كنت سابقاً، وبالنسبة لموضوع حديثنا النهاردة يعتبر خبر بايت على رأي أخوانا الصحفيين نسبياً إنما مكنش ينفع متكلمش عنه وسبب تأخيري في نزوله على المدونة هو العيد كل سنة وأنتم طيبين ـ حتى دي كمان تعتبر متأخرة ـ ونهاية الأجازة وتحضير شنطة السفر مرة تانية… المهم ما علينا نرجع لموضوعنا

كان اجتماع المدونين الثاني خلال شهر رمضان في نادي القوات البحرية بالجزيرة وكنا جميعاً في ضيافة شريف الكردي والطريف أن النادي ده مجاور لمبنى قيادة الثورة واللي بيخضع لعملية ترميمات حالياً، ولما مريت بيه حسيت أني في مكان شهد لحظات فارقة في تاريخ مصر المحروسة… وربما حيث وضعت قدمي وطأ نفس المكان قدم محمد نجيب أو جمال عبدالناصر أو عبدالحكيم عامر أو أنور السادات

دخلت النادي وكان معايا أصغر مدون في الاجتماع وهو مهند سبايدر بوي، ومن الواضح أن مهند سرق الأضواء مني وانهالت عليه القبلات والهدايا كمان وأكتر حد تفاعل معه كانت فاتيما روح قلب ماما وكان هيطير من الفرحة بصفقة أدوات الرسم اللي قدمتها له هدية وأفتتح الأدوات دي بعمل اسكيتش هدية لها وطلبت منه بعد ما قدمه لها أنه يكتب على الاسكيتش أسمه والتاريخ ، وكان ممتن جداً لاهتمامها الشديد به، وكيكي كمان ظبطته بهدية كويسة وطول الطريق واحنا مروحين كان بيغيظ فيا، ويقولي أنا الوحيد اللي كان بيرسم علشان كده جت لي هدايا أدوات رسم، واللي يغيظ أكتر بقى إن لما عادل بحب السيما سأله أنت جاي مع بابا؟ أنتفض وامتلأت عروقه وقال بنبرة جريئة وواثقة من نفسها "لأ … أنا مدون" قاااال يعني الواد شخصية … وذو حيثيته كمان

نرجع لاجتماع المدونين في البداية كنا قاعدين حوالين ترابيزة على النيل مباشرة يعني ممكن تمد أيدك تلمس النيل وكل شوية الترابيزة دي تكبر وتكبر مع توافد المدونين تباعاً وكنا معشر الرجال على جانب الأيمن من الترابيزة بدايةً من مهند أول واحد جنب المية والعبد لله وعادل بحب السيما وشريف الكردي وبدأ يزيد الجنب ده بوصول أحمد القاضي يا مراكبي ونور الدين محمود ومصطفى ريان وخالد همس الأحباب، وعلى الجانب الآخر من الترابيزة حيث نون النسوة كانت داليا قوس قزح وفاتيما روح قلب ماما وميرا إمرأة بعقل رجل وكيكي فكك مني وصفاء عصفور في الأسر ودعاء مواجهات، بالإضافة إلى آخرين وأخريات لم يسعفني الحظ للتعرف عليهم

دي الأجواء العامة للاجتماع، وكان مفاجأة اليوم حضور أحمد القاضي وده لأنه يا دوووب لسه واصل من الصين وكان صعب جدااااا حضوره في نفس اليوم وكان الله في عونه لضيق وقته وحضر بناء على رغبة قوس قزح الملحة لتفاجأ به الجميع عامة وتفاجئني بحضوره خاصة وبصراحة يعني دي كانت رغبتي في إني أقابله لأن أجازتي كانت على وشك نهايتها

وكان حديثي مع القاضي ممتع للغاية وكان يجلس على يساري قليلاً وكنت أتأمله بين الحين والآخر وأراه أكثر وسامة من الصورة الموجودة في البروفايل بتاعه، واتضح من حوارنا إنه كان موجود لفترة في الكويت وكان مقيم في منطقة قريبة مني و إن شاء الله احتمال يزور الكويت قريب بعد العيد واتفقنا على وعد بلقاء آخر في الكويت بإذن الله مع بعض المدونين المصرين المقيمين هنا في الكويت، وأخجلني كثيراً ثناءه على قصة غزل البنات، وأبديت له أسفي علشان مجبتش معايا مجموعته القصصية (الحياة بدون كاتشب) علشان يكتب لي عليها إهداء

وصل نورالدين محمود بعد شوية ودخلنا في مقارنة سياسية صغير كده على جنب بين الديمقراطية في الكويت والديمقراطية في مصر، وكانت الكفة أرجح لديمقراطية الكويت … وطبعاً لابد أن أعتذر لنور لعدم تواصلي وياه بعد لقاءنا ده والسبب إنه نزل موضوع عن نفس الاجتماع تحت عنوان "على ضفاف النيل" وحتى لا أتأثر بما كتبه وأنا أنقل الحدث من وجه نظري،خوفاً من براعة قلم نور وتمكنه من أدواته، وتجنبت زيارة مدونته الفترة اللي فاتت دي علشان أحفظ له حقه الأدبي فيما كتبه، وخوفاً على نفسي من الإحباط بعد ما أقرا اللي كتبه نور وبالتالي أتقاعس أكتر ما أنا متقاعس… وأرجو إن نور يتقبل عذري في تقصيري المبالغ فيه طول الفترة اللي فاتت


نرجع لمرجوعنا ألا وهو اجتماع المدونين، إذ فجأتاًاًاًاًاًاً ندهت عليا ميرا لفض الاشتباك بينها وبين مصطفى ريان ـ وكان جنبهم داليا قوس قزح بعد ما غيرت مكانها هي وصفاء عصفور في الأسرـ وكان حوار ميرا ومصطفى أكثر من ممتع وظريف للغاية لإنكار مصطفى لموهبتها وتأكيدها على تلك الموهبة وأدليت بدلوي في المناقشة الحامية دي مؤكداً موهبة ميرا ومستشهداً بقصة "عم حميد" اللي كتبتها في بداياتها التدوينية واللي مازالت عالقة بكل تفاصيلها بذهني، وبصراحة يعني كنت ببص لهزار ميرا ومصطفى وأنا في غاية الامتنان لأني كنت سبب بعد الله سبحانه وتعالى في تعارفهما ببعض وبحمد لله الشهر ده نزل لميرا قصة على مجلة ميكانو وإن شاء الله ربنا يوفقها للخير دايماً ومصطفى كمان الأديب الشاب صاحب القلم الرشيق

ودار حديث جانبي في كلمة ونص بيني وبين داليا عن موهبة الحاضرين زي كيكي وتميز موضوعها الخاص بتجمع المدونين في مستشفى أبوالريش بالإضافة لموهبة دعاء مواجهات ومصطفى ريان وميرا والقاضي وكثيرين من المتوقع إنهم يكونوا نجوم جامدة قريب أوووي إن شاء الله


رجعت تاني لمكاني جنب مهند سبايدربوي بس كان جنبه وقتها دعاء مواجهات وكيكي عوووو واتكلمنا شوية عن قصيدة دعاء اللي فازت بجايزة ونشرت مؤخراً في مجلة، ولم يتسع الوقت للمرة التانية وقد يكون تقصيراً مني للحديث مع كيكي عووو والتي تستحق كل تقدير لموهبتها الواااضحة وأفتكر إن عندها وقت دلوقت بعد ما اتخرجت لو تكتب مسلسل كوميدي في حلقات منفصلة زي راجل وست ستات مثلاً أو حتى متصلة مش هتفرق لأن كيكي موهوبة فعلاً وخيالها خصب جداً وإن شاء الله لو درست الفكرة كويس ممكن نشوف مسلسل من تأليفها في رمضان بإذن الله، وده الكلام اللي كان نفسي أقوله لها ومسمحتش الظروف إني أقوله

وبعد شوية من الززززن اللي كان على الترابيزة ، كان لازم نمشي علشان الوقت جري بسرعة من غير ما ناخد بالنا … ورفعت راسي لفوق شوية …وألقيت نظرة عامة على كل الموجودين، وكان مفيش حد فينا قاعد على نفس الكرسي اللي قعد عليه أول ما وصل. وكأننا كنا بنلعب …لعبة الكراسي الموسيقية


أعتذر مجدداً عن التأخير لظروف السفر وأسباب أخرى … وإن شاء الله نتقابل زي زمان كل يوم تلات على الشاشة دي