الاثنين، 23 مارس 2009

آنسة حنين


أوقف سيارته بالقرب من "الموول" الذي كان به بالأمس، حمل الأكياس التي يرغب في استبدال ما بداخلها بأخرى، نزل من سيارته واستدار حولها حتى وصل إلى باب المقعد المجاور له ثم فتحه لكي تخرج منه طفلته "حنين" ذات السنوات الأربع والتي يخشى عليها أن تفتح هي الباب وقد لا تنتبه إليها السيارات المسرعة .

أمسكها بيده اليسرى ليعبرا الطريق سوياً واليمنى مشغولة بأكياس الملابس، وصلا إلى الموظف المختص عن عملية الاسترجاع، دون أني يعره هو وأبنته أي اهتمام قام بالتأكد من أن الملابس بحالة جيدة ومن تاريخ فاتورة الشراء ـ وبشكل ميكانيكي ـ قدم له فاتورة أخرى لكي يظهرها إلى "الكاشير" بعدما ينتهي من استبدال مشترياته.

صعد للطابق العلوي الخاص بملابس الأطفال، أتجه مباشرة إلى فستان أعجبه بالأمس ولكنه كان في حيرة من أمرة هل سيكون مناسب لها أم صغير عليها، وبمنتهى المهارة وكأنه أحد العاملين مد يده على الشماعة التي بها المقاس الذي يريده بالتحديد طالباً منها أن تستدير، نزل على أطراف أقدامه لطوله الفارع بالنسبة لحجم أبنته، وضع الفستان على كتفيها من الخلف ليرى طوله وحجمه مناسب لها أم لا، تراجع برأسه قليلاً وهو في وضع القرفصاء حتى يرى الفستان بوضوح، أبتسم ابتسامة رضا ثم وضعه في السلة التي يتجول بها، مضى بعض الوقت أثناء بحثه عن ما يناسبها من أشياء أخرى، وبدأت تتأفف لشعورها بالإجهاد محاولاً استمالتها بأن هذه الأشياء الجديدة سترتديها في العيد.

انتهى من كل ما هو مخطط له، بقي شيء أخير يريدان أن يشتريانه "شنطة يد" لحنين ـ فهناك ولع لا يعرف سببه في حمل حنين لشنطة مع علمه أنها في سن ينجذب أكثر للعب وغالباً ما ستتركها من أجل أن تلهو مع قريناتها ـ تلفت حوله وجد بعض "الشنط" القريبة هناك، تشبثت بأول شنطة رأتها بالرغم من أنها أنسب للمراهقات، بذل جهوداً مضنية لإقناعها.

- يا حنين دي شنطة كبيرة ومتنفعش لك.
- طب بلاش دي وأخد دي .
- دي كمان كبيرة عليكي.
- خلاص أخد الصغيرة دي.
- دي شنطة صغيرة علشان "سوارية" وبتاعة بنوتات كبار.
- لأ دي صغيره، أنا عايزاها.

فشل في محاولة التأثير عليها، فأقترح عليها اقتراح.

- خلاص ناخدها معانا وننزل الدور اللي تحت نشوف ولو مفيش شنطة عجبتك ناخد دي.
- موافقة يا بابا.

هبطا في المصعد إلى الدور الأسفل الخاص بالمنتجات الجلدية، لفت انتباهه بالجهة اليسرى حذاء رجالي أراد أن يتأمله عن قرب، وعندما دنا منه لم يثير اهتمامه بالقدر الذي يدفعه لشرائه، عاد يميناً هو وابنته مخترقين قسم الأحذية والشنط النسائية لكي يصلا إلى قسم الأطفال، توقفت حنين عن المشي تماماً أمام أحدى الشنط التي أثارت اهتمامها، وبأصابع لا تكاد أن ترى.

- عايزة الشنطة الصفرا دي.
- دي ممكن تنفع لماما
- طب السودا
- دي كمان بتاعة ناس كبار زي ماما

بضيق وتأفف.

- هو كل حاجة ماما … ماما …ماما

أسرع في خطوته قليلاً حتى وصل إلى قسم الأطفال، محاولاً إثارة فضولها بالألوان البراقة.

- الله … شايفة شنطة "باربي" دي جميلة أوووي

عقدت حاجبيها وهي لا تعيره اهتمامها.

- لأ … وحشة.
- طب "الأورينج" دي ؟
- وحشة.
- دي بقى أجمل شنطة شوفناها وألوانها تمشي مع اللبس اللي اشتريناه النهاردة، وكمان على شكل "بوبي".
- لأ مش عايزاها.

حاول امتصاص غضبه خلف ابتسامة عله يستطيع التأثير عليها للمرة الأخيرة.

- طب أنت عايزة أيه دلوقت.
- عايزة الشنطة الصغيرة اللي اخدناها من فوق.

قرر استخدام المنطق وإعمال العقل في عقد مناظرة بين الشنطتين مقارناً بينهما موضحا مزايا الشنطة الأنسب لسنها دون أن يصارحها بهذا الأمر … الذي يثير أعصابها، أصرت مجدداً متمسكة باختيارها، لم يكن هناك بد من أن ـ يتصل بصديق ـ كي يفض النزاع الناشب بينهما، روى لـ "الأم" قصته ثم أعطى حنين "الموبايل" لتروي قصتها هي الأخرى مستجيرة بأمها من رجعية أبيها، تمتلك الأم كعادتها الكلمات السحرية ومفاتيح شخصية أطفالها إذ اقتنعت حنين بالشنطة التي عرضها عليها أبيها… وإن كانت هذه الموافقة جاءت على مضض.

- ذهب "للكاشير" مقدماً له الفاتورة السابقة بقيمة المشتريات التي استبدلها ودفع الفارق.

يداعبها "الكاشير" وهو يخرج الأوراق التي يملئون بها الشنطة لتأخذ حجمها الطبيعي.

- الشنطة دي بتاعتك؟

أجابت عليه بإيمائه دون اكتراث.

أخرجتها من الكيس الذي بيد أبيها طالبه منه بعض العملات الورقية والفضية لملئ جيوب شنطتها قدر المستطاع ، عادت إليها ابتسامتها وكأن شيئاً لم يكن، عبرا الشارع ليعودا من حيث أتيا وهي تقذفها في الهواء ليعلم المارة أن بيدها "شنطة"، فتح لها باب السيارة مداعباً.

- أتفضلي يا آنسة.

رفعت رأسها لأعلى وهي تنظر إليه باندهاش ثم أغمضت طرف عينيها … في خجل مشوب بالدلال.

35 Comentários:

Jana يقول...

عارف لما تتفرج على منظر طبيعى رائع فى شاشة مسطحة لتلفاز ضخم معروض فى مول زى مول قصتك هنا ..وتلاقى الصورة حتنطق والورد حيطلع بره الشاشة بتوصف الوردة ساعاتها بان تفاصيلها حية
كل ده بقى عشان اقولك ان تفاصيل قصتك حية اوى
صعدنا معه الى الدور العلوى واخذنا وضع القرفصاء وتراجعنا برأسنا
وشد انتباهنا معه الحذاء الرجالى "مع انى مش مولعة طبعا بالاحذية الرجالية"
بشكل عام انا اعشق التفاصيل الصغيرة والتى تعطى روحا لاى قصة ..واعتقد ان دى من احلى ميزاتك فى الكتابة وجايز تكون بسبب حسن مشاهدتك لاى فيلم بمعنى انك اتعودت تتدقق فى التفاصيل اللى مش كتير بياخدوا بالهم منها وانعكس ده عليك فى كتاباتك
استمتعت فعلا بالقصة الجميلة واللطيفة كبطلتها الانسة الصغيرة
تفتكر كان فى اتفاق مسبق بين الأب وزوجته ...عشان كده عرف احدى الكلمات السحرية وقاللها ...يا آنسة!!!!!؟
:)

تحياتى يا وليد

mostafa rayan يقول...

حلوة القصة قوي
واضح فيها اهتمام الاب ببنته ( الخيط اللي انت لسة بتلعب عليه )
اهم ما يميز هذه القصة بساطةاسلوبها ربما ليلائم برائة الاطفال حيث ان الطفلة هنا محورالحدث
تحياتي ليك يا جميل

_______

مرسل إليك هدية عبر الميل اتمنى تعجبك ومنتظر رأيك فيها

صفــــاء يقول...

الطفله الصغيرة بتحب تستحوذ على أهتمام أبيها
أوقات بتغير من وجود الأم
بتغير من اهتامه بيها او دلاله ودلالها ليه فى بعض الاوقات
لكن لا تنسى على الاطلاق انها امها
وغير قادر على أقناعها وأرضائها غير الام
عارف .. زى أتنين ضراير بس بيحبو بعض
نفس الشئ فى علاقه الولد بأمه

قصتك متحركه ناطقه
تحياتى لك

فكرة من الزمن ده يقول...

كلنا كبنات كنا حنين الموقف ده بكل تفاصيله عدى علينا مع بعض التغيرات البسيطة حسيت اني عشت المشهد ده قبل كده
جميلة القصة وطريقتك في السرد

ميرا ( وومن ) يقول...

ازيك يا وليد

يارب تكون بخير
----------------

طب تصدق بقي انا حبيت حنين دي خالص عارف يا وليد اجمل ما في كتاباتك انها كتابات حية

بجد جواها روح جميلة خلتني شايفة حنين قدامي وابتسمتلها ابتسامة واسعه لما وشها احمر في دلال

يا مراكبي يقول...

القصة عبارة عن لقطة حية من الحياة قدرت إنت إنك تنقلها لينا على الهواء مباشرة ورسمتها بتفاصيلها الدقيقة جدا لدرجة أصغر الإيماءات والإنفعالات

عايز أقولك إن فاضل لمسات صغيرة وتبقى كأنك بتكتب سيناريو لفيلم أو مسلسل مثلا

قوس قزح يقول...

البنت و الاب
حالة فريدة من انواع الحب
هو لها رمز الرجولة و مثلها الاعلى
و الام لها هى الغريمة فى قلبه
و الاغرب ان الاب بيشجعها على الاحساس ده و يحاول بكل الطرق يحافظ على الصورة دى فى خيالها و فى الحالة دى لما يكون فى رفض منه لشىء بيلجأ للام علشان تكون هى الواجهة للرفض ده ..و النتيجة الام هى محطمة الاحلام لها

اما عن التطلع لحاجات اكبر من سنها
فاعتقد ان الفتاة تحلم بذلك حتى العشرين من عمرها لتصل لسن اهتمام الرجل بها كأنثى .. و ايضا بعد العشرينات تظل تحلم بانها ما زالت فى العشرين حتى تبقى الفتاة البضة الجميلة

لكن اجمل شىء فى الدنيا ان الواحد يتمتع بلحظات عمره كما هى بدون محاولات للظهور بسن مختلف
كويس جدا ان الاب لم يخضع لها

قصة جميلة و تحمل معانى انسانية كثيرة

تحياتى

أحلى حياة يقول...

اللـــــــــــــــــــــــــــــــــه
عسوله اويييييييي
حلوه اوي بجد
تحفه
تجنن بجد
:D:D

اسلوب الروايه والسرد أكثر من رائع ما شاء الله :)


خالص تحياتي :)))

تايه في وسط البلد يقول...

مش عارف

الموضوع اكبر من ان يكون قصة

او حتي توصيف لعلاقة اب بابنته

السطور تعطينا اكثر من ذلك بكثير

كما لو كانت تخليد للقطة حلوة من عمر الزمان ..تلك اللقطات التي نود لو نمسك عليها بالاظافر

ليست قصة

ليست ابدا قصة

mohra يقول...

هكذا هم الاطفال دوما
من اجمل ما كتبت
تحياتى

خرج ولم يعد يقول...

السهل الممتنع هو السمه المميزه بجد لكل كتاباتك الموضوع بسيط جداااا لكن فيه احساس قووووووى جدااا وبيسيب أثر قوى فى نفس الواحد

ربنا يوفقك وتفضل تمتعنا

محمد فوزي يقول...

هي تلك الكلمه السحريه , هو ذالك الشيء الذي يولد مع كل فتاه فيخرج فطرياً ليفرض نفسه على الأجواء ويلقي ظلال دفأه على المحيطين حتى ولو بعمر الطفوله ... الأنوثه

وكم كان جميلا وصفك لهذا المشهد وكيف تعاملت رجولة الأب بذكاء مع انوثة بنته , وبالفعل جعلتنا نحب حنين ووالدها

فكل التحيه لك

dr.lecter يقول...

انت فيين ياابني ؟

!!! عارفة ... مش عارف ليه يقول...

Jana
*******

"واعتقد ان دى من احلى ميزاتك فى الكتابة وجايز تكون بسبب حسن مشاهدتك لاى فيلم بمعنى انك اتعودت تتدقق فى التفاصيل اللى مش كتير بياخدوا بالهم منها وانعكس ده عليك فى كتاباتك"
------------

متهيئيلي لو أي ناقد بيقيم كل اللي قدمته طول الفترة اللي فاتت في التدوين

معتقدش كان هيضيف حاجة أكتر من اللي قولتيه .. حطيتي ايدك على حاجات ممكن اكون مش واخد بالي منها

سعيد جدا بإهتمامك الشديد ده .. وإن كان مش غريب عليك :)

خالص تحياتي
وليد

!!! عارفة ... مش عارف ليه يقول...

mostafa rayan
***************
أولا تسلم على الهدية وعجبتني جدااا :)
وميرسي بجد على ذوقك أنك أشبعت فضولي في أني أشوف اللي فاتي وكمان أكتر من اللي فاتني
--------------------

وشكراً جزيلاً لكلماتك الرقيقة على القصة

تحياتي
وليد

!!! عارفة ... مش عارف ليه يقول...

صفـــــاء
***********

"قصتك متحركه ناطقه"

--------

والله ده أقصى ما أسعى إليه

شكراً لك


دومتي بكل خير
وليد

!!! عارفة ... مش عارف ليه يقول...

فكرة من الزمن ده
******************

فعلا كل البنات بتعيش المشهد ده مع اختلاف بصورة مختلفة .. ويمكن علشان كده بيلمس كتير من البنات

وعلى فكرة أنا من المعجبين بمدونتك
وإنك بالفعل مش بتدوني لمجرد الترفيه

تحياتي
وليد

!!! عارفة ... مش عارف ليه يقول...

وومن
********

أهلا ميرا
الحمد لله بخير :)

----------------

"عارف يا وليد اجمل ما في كتاباتك انها كتابات حية "

دي شهادة كبيرة من قارئة جيدة أعرف قدرها

ياريت أنت كمان متكسليش وتكملي بقية اجزاء القصة بتاعتك

دومت بكل خير
وليد

!!! عارفة ... مش عارف ليه يقول...

سجل المزورين
************

شكراً جزيلاً

!!! عارفة ... مش عارف ليه يقول...

يا مراكبي
*********

" عايز أقولك إن فاضل لمسات صغيرة وتبقى كأنك بتكتب سيناريو لفيلم أو مسلسل مثلا"

أشكرك على تقديرك الجممممم والذي أخجلني كثيراً من شخص أعرف حق قدره

خالص احترامي وتقديري
وليد

!!! عارفة ... مش عارف ليه يقول...

قوس قزح
***********

واضح من تعليقك أنك أم ماشاء الله

وعارفة كويس أووي سيكولوجية أولادك

وبتعرفي تتعاملي معهم كويس :)

ربنا يخليهم لك ... ويخليكي لهم


دومتي بكل خير
وليد

!!! عارفة ... مش عارف ليه يقول...

أحلى حياة
***********

شكراً جزيلاً

على كلامك الجميل ده :)


خالص تحياتي
وليد

!!! عارفة ... مش عارف ليه يقول...

تايه في وسط البلد
******************

"كما لو كانت تخليد للقطة حلوة من عمر الزمان ..تلك اللقطات التي نود لو نمسك عليها بالاظافر"

بالفعل اللقطات دي .. هي عمرنا


دومت بكل خير صديقي

!!! عارفة ... مش عارف ليه يقول...

mohra
********

شكراً جزيلاً :)


تحياتي
وليد

!!! عارفة ... مش عارف ليه يقول...

محمد فوزي
***********

أسعدتني كلماتك .. وشكراً جزيلاً على زيارتك الأولى

وإن شاء الله لا تكون الأخيرة


دومت بكل خير
وليد

!!! عارفة ... مش عارف ليه يقول...

dr.lecter
************

معلش سوري على التأخير :$

بس كان غصب عني والله

!!! عارفة ... مش عارف ليه يقول...

خرج ولم يعد
***********

دايماً قرائتك قيمة

وأنتظر تقييمك بشكل دائم


خالص تقديري وإحترامي
وليد

كيكى عوووووو يقول...

***ابتسامة كبيرة اوووووووى**
دة تعبير وشى بعد ما قريت قصتك
**اية دة العلاقة بين الاب والبنت ليها سحر خاص ميحسش بده غير الى مفتقد الاحساس دة**
مش بقولك دايما بحس انك بتخطفنى فى قصصك وبروح كدة بسرح مع الشخصيات فى عالم تانى ودايما مهتم انت بالتفصيل اقصد لمة الاب كان عايز يشترى حذاء لى بس هو فضل ارضاء وسعادة بنته عليا
***اخيرا رجعت وقريت قصصك تانى**
تصدق نسيت اقولك اززززززززززززززيك؟؟
عووووووووووووووووووو

بنت مصريه يقول...

الله يا وليد
انا طول منا بقرا البوست
بتخيل حنين
وابوها الدبلوماسى جدا جدا
ههههههههههههه
جميله قوى القصه احييك

msafa يقول...

رائع البوست اوى اوى
انا حمدت ربنا ان ده مش بيحصل معايا بس بيحصل فى البيت بس يعنى شنط ونونو ومكياج ... وقدام المرايا اللى بفكر انى اشيلها من اوضة النون لان المرايا هاتجننها ... وكمان قمصان النوم ولبس خروج امها ... مش تبوس بنتك الحلوه ولا انت مش عارف انى حلوه ... هههههههههه
عاجبنى البوست اوى لمسنى من جوه
تقبلى مرور ى

قلب ينبض بالحب يقول...

يمكن دي اول زيارة عندك بس ان شاء الله مش هتكون اخر زيارة اسلوبك في التسلسل رائع بيشد القارى من اول سططر الي اخر حرف بالتوفيق وربنا يكرمك

!!! عارفة ... مش عارف ليه يقول...

كيكى
********
الله يسلمك
إن شاء لله انت كمان تكوني بخير

اكتر حاجة فرحتني في كلامك
هي ابتسامتك البيرة اووووي دي
وإن شاء الله تفضل الابتسامة دي موجودة على طول واللي جاي يكون احسن من اللي فات إن شاء الله

دومتي بكل خير
وليد

!!! عارفة ... مش عارف ليه يقول...

بنت مصريه
************
اولا حمد لله على سلامتك
دي أهم حاجة وإن شاء الله ترجعي للتدوين زي الاول وأكتر

وشكراً جزيلاً على كلامك الجميل ده :)

خالص تحياتي
وليد

!!! عارفة ... مش عارف ليه يقول...

msafa
*******
تعليقك في حد ذاته يعتبر قصة

واخدني اووي التعبير التلقائي ده

"مش تبوس بنتك الحلوه ولا انت مش عارف انى حلوه ... هههههههههه "

ولمسني أووي من جوه انا كمان :)

تحياتي
وليد

!!! عارفة ... مش عارف ليه يقول...

قلب ينبض بالحب
***************

سعدت بأول زيارة
وإن شاء الله زي ما قولت متكونش الاخيرة

واسعدني اكتر مجاملتك الجميلة :)

خالص تحياتي
وليد

Powered By Blogger
All Rights Reserved © Waleed AlZhairy - 2008/2013

وليد الزهيري © 2008. Template by Dicas Blogger.

TOPO